پاڪستان ۽ بوسنيا پاران واپار، زراعت ۽ ٻِن شعبن ۾ تعاون وڌائڻ تي اتفاق

سراجيوو (پاکستان نیوز پوائنٹ 21دسمبر2016ء) پاڪستان ۽ بوسنيا واپار، زراعت، ٽيڪسٽائيل، تعليم ۽ دفاعي شعبن ۾ ٻطرفي تعاون کي وڌيڪ مستحڪم ڪرڻ تي اتفاق ڪيو آهي. اهو اتفاق راءِ ڪالهه اربع ڏينهن سراجيوو ۾ وزيراعظم نواز شريف ۽ سندس بوسنين هم منصب ڊاڪٽر ڊينس زيوزڊيڪ جي وچ ۾ نويڪلائي ۾ ملاقات دوران طئي ڪيو ويو. وزيراعظم محمد نواز شريف ان موقعي تي چيو ته پاڪستان بوسنيا سان لاڳاپن کي وڏي اهميت ڏي ٿو ۽ بوسنيا پاران واپار، دفاع ۽ ثقافتي شعبن ۾ گڏيل منصوبن جي آجيان ڪندو. بوسنيا جي وزيراعظم ڊاڪٽر ڊينس زيوزڊيڪ چيو ته پاڪستان ۽ بوسنيا جي وچ ۾ تعليمي ۽ ثقافتي رابطن ۾ اضافي سان ٻنهي ملڪن جي پبلڪ سيڪٽرز جي ادارن جي وچ ۾ تعاون ۾ اضافو ڪري سگهجي ٿو. وزيراعظم نواز شريف ٻنهي ملڪن جي وچ ۾ عالمي ۽ گڏيل قومن جي سطح تي موجود تعاون کي ساراهيو. هن ٻنهي ملڪن جي پارليامينٽس ۽ عوام جي وچ ۾ رابطا وڌائڻ جي ضرورت تي زور ڏنو. بعد ۾ ٻنهي اڳواڻن وفدن جي سطح تي ڳالهين جي قيادت ڪئي. وزيراعظم جو پرڏيهي معاملن وارو خصوصي معاون طارق فاطمي ۽ بوسنيا ۾ پاڪستان جو سفير ليفٽيننٽ جنرل (ر) سليم نواز پڻ ان موقعي تي موجود هئا.