دنیا بھر وچ انوکھے انوکھے قانون ہوندے نیں۔ انڈیا وی ایس معاملے وچ کسے توں پچھانہ نہیں اے۔ پر ایہناں قوانین دے نتیجے وچ کئی ویلے کُجھ مضحکہ خیز واقعات پیش آ جاندے نیں۔ اجیہا ای اک واقعہ کُجھ دن پہلے پیش آیا۔ تفصیل مطابق اک رات 44ورھیاں دا بس کنڈکٹر لمے سفر مگروں اپنی سیٹ اُتے بیٹھا سی۔ اوہدی سرکاری بس شہر ہروڑ نوں قبائلی علاقے نال ملان دا واحد وسیلا سی۔
بس جنگل توں لنگھن لگی تے ڈیوٹی اُتے تعینات محکمے دے انسپکٹر نے اوہنوں رُکن دا اشارہ کیتا۔ بس ڈرائیور یاں ٹکٹ دین والے کنڈکٹر نوں اندازہ نہیں سی کہ کُجھ چِر پچھوں کُجھ ہون الا اے۔ اک انسپکٹر نے ٹکٹاں دی پُن چھان کردے ہوئے اک مسافر اُتے اُچیچی نظر ماری۔ 45ورھیاں دا مسافر نشے وچ دھت وکھالی دتاجہدے ہتھ وچ کبوتر وی سی۔ اوہ بندہ کبوتر نال اُچی آواز وچ گلاں کر رہیا سی جدکہ کبوتر ظاہر اے اوہنوں جواب نہیں دے سکدا سی۔
انسپکٹر نے کنڈکٹر توں شرابی دی ٹکٹ دی بجائے پُچھیا کہ کیہ ایس کبوتر کول بس وچ سفر کرن دا ٹکٹ ہے اے؟ کنڈکٹر نے واضح کیتا کہ ایس کبوتر دی وجہ نال کوئی مسئلا نہیں اے، کیونکہ اوہ شرابی بندے نال ایس بس وچ سوار نہیں ہویا سی۔ تے بس بس دی باری وچ کبوتر دے بیٹھن اُتے اوس بندے نے اوہنوں پھڑ لیا سی۔ انسپکٹر نے کہانی اُتے یقین نہ کیتا تے اک دفتری اصول دا حوالا دتاجہدے مطابق جے کوئی مسافر 30کبوتراں نال سفر کردا اے تے اوہنوں کرایے دا چوتھائی حصہ دینا پئے گا۔
بس کنڈکٹر نے آکھیاکہ ایہ اصول صرف اک کبوتر نال لیجان اُتے لاگو نہیں کیتا جا سکدا۔ ایہدے مگروں اوس انسپکٹر نے تامل ناڈوو سٹیٹ ٹرانسپورٹ کارپوریشن خلاف شکایت لکھ دتی۔ ایس توں وکھ کبوتر توں کرایہ نہ لین اُتے کنڈکٹر نوں جرمانہ وی کر دتا۔
