خانہ کعبہ دے بالکل ساہمنے کلاک ٹاور اُتے موجود چن اندر کیہدا کمرہ اے؟

کلاک ٹاور اُتے موجود چن اندر کمرہ کس واسطے بنایا گیا اے؟

خانہ کعبہ دے بالکل ساہمنے کلاک ٹاور اُتے موجود چن اندر کیہدا کمرہ اے؟
کلاک ٹاور اُتے موجود چن اندر کمرہ کس واسطے بنایا گیا اے؟

مکہ مکرمہ( پاکستان پوائنٹ نیوز19۔جون2018ء ) سعودی عرب وچ بیت اللہ شریف دے عین ساہمنے اک خوبصورت بلڈنگ بنی ہوئی اے۔ایس بلڈنگ دا ناں ’مکہ کلاک ٹاور‘ اے۔ ایس کلاک ٹاور بارے لوکاں دے ذہن وچ کئی قسم دے سوال آؤندے نیں۔ کلاک ٹاور اُتے موجود چن اندر اک کمرہ وی اے۔ ایس اُچے کلاک ٹاور دا افتتاح 2013وچ ہویا تے اوس ویلے ایہ دنیا دی تیجی اُچی بلڈنگ سی۔

ایس ٹاور دی اُچیائی 607میٹر(1991فٹ) اے تے ایس بلڈنگ دی ٹیسی اُتے سنہرے رنگ دا خوبصورت چن(پہلی تاریخ دا چن) بنایا گیا اے۔ جو اینا وڈا اے کہ دوراں وی اوہنوں ویکھیا جا سکدا اے۔ بھاویں بہت سارے لوک ایس کلاک ٹاور بارے بہت کُجھ جاندے ہون پر ایہدی اک شے جیہدے بارے یقینن کسے نوں پتا نہیں ہونا، اوہ ایس ٹاور دی ٹیسی اُتے بنائے گئے خوبصورت چن دی تہہ وچ اک ہال نما خاص کمرہ اے، جیہدی چھت نہیں اے۔

ایہ اوپن ائر ہال صرف اللہ تعالی دی عبادت کرن لئی رکھیا گیا اے۔ ایس ویلے ایہ ہال دنیا بھر وچ عبادت کرن والیاں اُچیاں تھاواں وچوں اک اے۔ تُسیں ایہنوں دنیا دی اُچی ترین مسجد وی آکھ سکدے او۔ ایس ہال تیکر اپڑائی اک لفٹ راہیں ممکن اے۔ لفٹ دا سفر ختم ہون اُتے10میٹر دا پندھ (فاصلہ) پیدل کرنا پیندا اے۔ جیہدے مگروں ایس خوبصورت چن اندر بنے کمرے تیکر اپڑیا جاندا اے۔ایس کمرے دی چھت نہ ہون دی وجہ توں ایہدے توں آسمان صاف وکھالی دیندا اے۔ ہیٹھاں ویکھیئے تے ہور بلڈنگاں دے نال نال خانہ کعبہ وی وکھالی دیندا اے۔