باہا( پاکستان پوائنٹ نیوز04۔جون2018ء ) 29ورھیاں دا سعودی خاوند اوس ویلے ہکا بک رہ گیا جدوں جان توں پیاری اوہدی بیوی طلاق لین لئی عدالت اپڑ گئی۔ سعودی شہری نوں ایہ گل سمجھ نہیں آ رہی سی کہ جدوں اوہنے اپنی بیوی نوں خش رکھن وچ کوئی کسر نہ چھڈی تے فیر اوہ طلاق لین لئی اینی ضِد کیوں کر رہی۔ خلع دا دعوا دائر کرن والی سوانی نے اعتراف کیتا کہ اوہدے خاوند نے کدی اوہدی کوئی فرمائش رد نہیں کیتی پر اوہ اوہدے توں ایس لئی طلاق لینا چاہندی اے کیونکہ اوہ مینوں اپنی ماں اُتے ترجیح دیندا اے۔
سوانی نے آکھیا کہ میں کدی ایس طرحاں دے بندے اُتے بھروسہ نہیں کر سکدی جو اپنی بیوی لئی تے سبھ کُجھ کردا اے پر اپنی ماں دی ذرا جیہی گل نوں وی منن توں انکار کر دیندا اے۔ ایس صورتحال توں پریشان خاوند نے جج توں آکھیا کہ اوہ اپنی بیوی نوں نہیں چھڈنا چاہندا، اوہ اوہنوں خش رکھن لئی سبھ کُجھ کرے گا۔ پر بیوی نے اوہدی ایہ گل منن توں انکار کر دتا۔
سوانی نے عدالت ساہمنے اعتراف کیتا کہ خاوند نے اوہدے اُتے بہت پیسا خرچ کیتا ، اوہنوں باہرلے ملک وی لے کے گیا تے اوہدی خاہش دی ہر شے وی مُل لے کے دتی پر اوہ فیر وی اوہدے نال زندگی نہیں لنگھانا چاہندی کیونکہ جس بندے دا سلوک اپنی ماں نال چنگا نہیں اے اوہدے اُتے کدی بھروسہ نہیں کیتا جا سکدا۔ اوہ کل نوں کسے وی ویلے میرے توں مُونہ موڑ سکدا اے۔
ایہدے اُتے عدالت وچ خاوند نے پُچھیا کہ کیہ میں تہاڈی خاطر اپنے گھر والیاں نوں نہیں چھڈیا؟ جیہدا سوانی نے جواب دتا ہاں ایہو وجہ اے جو میں تیرے توں طلاق لینا چاہندی آں۔ سوانی دا کہنا سی کہ اوہدے خاوند نے جو کُجھ وی آکھیا اوہ ٹھیک اے پر اوہنے اپنے خاوند توں وکھ ہون دا پکا ارادہ کر لیا اے کیونکہ اوہنے مینوں اپنے پورے خاندان اُتے ترجیح دتی،ایتھوں تیکر کہ اپنی ماں اُتے وی۔
سوانی نے ایس گل اُتے اصرار جاری رکھیا کہ اوہ اوس دن دی اُڈیک نہیں کرے گی جدوں اوہ مینوں ایس طرحاں چھڈ دیوے گا جس طرحاں اوہنے اپنی ماں نوں چھڈیا سی۔ سوانی نے اپنے خاوند ولوں دتا گیا جہیز دا سامان واپس کر دتا، جیہدے مگروں طلاق لین د اعلان کیتا۔جج ولوں سوانی دے ایس موقف نوں سلاہندے ہوئے آکھیا گیا کہ سوانی ولوں ایس گل اُتے طلاق لینا کہ خاوند نے اپنی ماں نوں بیوی دے مقابلے وچ گھٹ درجہ دتا سی بہت چنگی سوچ اے۔
