اسلام آباد(پاکستان پوائنٹ نیوز01۔ستمبر۔2018ء) 18قیراط سونے نال بنی لگژری گڈی پاکستان اپڑ گئی اے۔ تفصیل مطابق 18 قیراط سونے نال بنی لگژری گڈی لیمبور گینی اسلام آباد اپڑ گئی۔ تن دن پہلاں ایس گڈی نوں برطانیہ توں دبئی درآمد کیتا گیا سی جیہدے مگروں ہن ایہ گڈی اسلام آباد اپڑ گئی اے۔ ایہ گڈی 18قیراط سونے نال بنائی گئی اے جیہدا مُل 18کروڑ رُپئے اے۔ اسلام آباد اپڑن والی ایس مہنگی گڈی دے مالک دا تعلق وی اسلام آباد توں اے۔ گڈی دے مالک نے ایس لگژری گڈی دی درآمد لئی حکومت پاکستان نوں 10کروڑ رُپئے توں ودھ ڈیوٹی تے ٹیکس دتے۔ کسٹمز حکام ولوں ایس گل دی تصدیق کیتی گئی اے کہ لگژری گڈی لیمبور نوں پاکستان لیان لئی کسٹم ڈیوٹی، ریگولیٹر ڈیوٹی تے دو فیصد ہور ٹیکس دتا گیا اے۔ سوشل میڈیا اُتے وی ایس لگژری گڈی دی ویڈیو وائرل ہوگئی اے۔ ایہ گڈی اسلام آباد دیاں سڑکاں اُتے آؤندے ای لوکاں دی توجہ دا مرکز بن گئی تے ہر کوئی اسلام آباد دیاں سڑکاں اُتے نسدی مہنگی سونے نال بنی گڈی نوں ویکھدا ای رہ گیا۔
