لاہور( پاکستان پوائنٹ نیوز29۔جون2018ء ) دنیا بھر وچ کئی ایس طرحاں دے بندے نیں جو اپنے پیسیاں نال غریب بندیاں دی مدد کردے نیں۔ ایس حوالے نال کئی این جی اوز تے فلاحی ادارے وی کم کر رہے نیں۔ پر لوکاں دی مدد کرن وچ غریب لوک وی کسے توں پچھانہ نہیں رہے۔ اک غریب ٹیکسی ڈرائیور دی تصویر سوشل میڈیا اُتے وائرل ہوئی اے۔ غریب ٹیکسی ڈرائیور نے انسانیت دی وڈی مثال قائم کر دتی اے۔
غریب ٹیکسی ڈرائیور بارے آکھیا جا رہیا اے کہ ایہ اپنی ٹیکسی وچ مجبور تے بیمار لوکاں نوں مفت سواری دیندے نیں۔ ایس حوالے نال نوجوان ٹیکسی ڈرائیور نے اپنی گڈی اُتے اک ڈسپلے کارڈ وی رکھیا ہویا اے۔ جیہدے اُتے لکھیا اے کہ ایہ ٹیکسی بیمار لوکاں نوں مفت سواری دی سہولت دیندی اے۔ نوجوان نے اپنا نمبر وی دتا اے تاں جے کوئی بیمار بندہ اوہدے نال رابطہ کرسکے۔ آکھیا جا رہیا اے کہ ایف الیون اسلام آباد وچ ایہ نوجوان رہندا اے پر اجے تیکر ایس بارے کوئی مصدقہ اطلاع ساہمنے نہیں آئی۔ تے نہ ای نوجوان ناں دا ساہمنے آیاا ے پر جدوں سوشل میڈیا اُتے نوجوان ٹیکسی ڈرائیور دی تصویر وائرل ہوئی تے سوشل میڈیا ورتیندڑاں ولوں اوہناں دے جذبے نوں سلاہیا جا رہیا اے۔
