گڈی دے دیوانے نوں مرن مگروں اوہدی وصیت مطابق گڈی سنے دفنا دتا گیا

چین( پاکستان پوائنٹ نیوز05۔جون2018ء ) انسان مرن توں پہلاں وصیت لکھدا یاں لکھواندا اے، جیہدے وچ عام طور اُتے اوہ اپنی جائیداد بارے کئی فیصلا کردا اے کہ اوہدی جائیداد نوں مرن مگروں کیہدے حوالے کیتا جائے یاں فیر وصیت وچ انسان اپنے کسے قریبی بندے لئی نصیحت وی لکھدا اے پر چین وچ اک انوکھا واقعہ ساہمنے آیا اے جتھے اک گڈی دے دیوانے بندے نے ایہ وصیت کیتی کہ اوہنوں مرن مگروں وی گڈی وچ دفنایا جائے۔ قومی اخبار دی اک رپورٹ مطابق اُنج تے وصیت وچ گھر، جائیداد تے قیمی شیواں دی ونڈ دا فیصلا یاں اپنے پیاریاں لئی کوئی سنیہا ہوندا اے پر چین دے صوبے بیبائی وچ مرن والے بندے دی تابوت دی بجائے گڈی وچ دفنان دی وصیت نے سبھ نوں حیران کر دتا۔ چینی بندے نے مرن توں پہلاں ایہ وصیت کیتی سی کہ اوہدے مرن مگروں اوہدی قیمتی گڈی وچ اوہنوں دفنایا جائے۔کیونکہ اوہ اپنی گڈی نال بہت پیار کردا اے۔ گڈی دے ایس دیوانے نوں اوہدی وصیت مطابق مرن مگروں گڈی وچ دفنایا گیا۔ جدکہ سوشل میڈیا اُتے مردے نوں گڈی سنے دفنان دی ایہ ویڈیو وی وائرل ہوگئی اے۔ ویڈیو وچ ویکھیا جا سکدا اے کہ مردے نوں قبر وچ سلور رنگ دی ہنڈائے سوناٹا گڈی وچ لاہیا جا رہیا اے۔