برمنگھم( پاکستان پوائنٹ نیوز18۔جولائی۔2018ء ) ساری رات پیدل ٹُر کے دفتر آن والے ملازم نوں باس نے اپنی نویں گڈی تحفے وچ دے دتی۔ غیر ملکی میڈیا مطابق امریکی ریاست ایلاباما دے شہر برمنگم دے واسی والٹر کار نامی 20ورھیاں دے نوجوان نوں سامان دی منتقلی دا کم کرن والی کمپنی وچ ملازمت ملی سی۔ اوہدی گڈی خراب ہو گئی تے سویرے اوہدی نویں نوکری دا پہلا دن سی۔
کیونکہ والٹر دی ملازمت دا پہلا دن سی ایس لئی اوہ کسے وی طرحاں نویں نوکری اُتے اپنی حاضری نوں یقینی بنانا چاہندا سی۔ میڈیا رپورٹس وچ دسیا گیا کہ والٹر نے کسے سوانی دا سامان اپڑانا سی، اوہنے فیصلا کیتا کہ اوہ گڈی خراب ہون دی پرواہ کیتے بغیر پیدل سفر کرکے ویلے اُتے اوس سوانی دا سامان اپڑائے۔سامان اپڑان لئی والٹر نوں ساری رات پیدل ٹُرنا پیا۔
والٹر نے 20میل یعنی 7گھنٹے پیدل سفر کر کے سامان اپڑایا۔جدوں والٹر پیدال سفر کر رہیا سی تے اک پولیس اہلکار اوہدے کولوں بہت متاثر ہویا ، جیہنے والٹر نوں ناشتہ وی کروایا۔ سوشل میڈیا اُتے والٹر دی کہانی وائرل ہو گئی۔سوشل میڈیا اُتے والٹر دی ہمت نوں داد دتی گئی ۔ کمپنی دے سی ای او تیکر جدوں والٹر دی کہانی اپڑی تے اوہ وی ایہدے توں متاثر ہوئے بغیر نہ رہ سکیا تے اپنی نویں گڈی دی چابی والٹر نوں تحفے وچ دے دتی۔
باس کولوں چابی لیندے ہوئے والٹر وی جذباتی ہو گیا۔ تے اوہدیاں اکھاں وچ اتھرو آ گئے۔ کیونکہ والٹر نے سوچیا وی نہیں سی کہ کم نال لگن تے محبت دا اوہنوں ایہ بدلا ملے گا۔ والٹر دا کہنا سی کہ اوہنے کدی ہمت نہیں ہاری تے نہ کدی کم توں جی ہٹایا۔ والٹر دا کہنا سی کہ میں ہار اودوں ای قبول کراں گا جدوں میں آپ ہمت ہاراں گا۔
