نویں دِلی( پاکستان پوائنٹ نیوز06۔جون2018ء ) بھارت توں تعلق رکھن والا نکیش اروڑہ ٹیکنالوجی دی دنیا وچ سبھ توں ودھ تنخاہ لین والا چیف ایگزیکٹو افسر ( سی ای او) بن گیا۔نکیش’ پالو آلٹو نیٹ ورک‘ دا نواں سی ای او بنیا اے، اوہدی تنخاہ سالہوار(سالانہ) 12.8کروڑ ڈالر تقریبن 857کروڑ انڈین رُپئے ہوئے گی۔ پالو آلٹو سائبر سکیورٹی کمپنی اے۔ ٹیکنالوجی سیکٹر وچ نکیش اروڑہ دا لمبا کیریئر رہیا اے۔
بھارتی ٹی وی مطابق نکیش دی تنخاہ 6-7کروڑ رُپئے ہوئے گی تے اینا ای اوہناں نوں بونس ملے گا۔ ایہدے نال اوہناں نوں 268کروڑ رُپئے دے شیئر ملن گے جیہناں نوں اوہ ست سال تیکر ویچ نہیں سکن گے۔بھارتی ٹی وی مطابق جے نکیش، پالو آلٹو دے شیئر دی قیمت ست ورھیاں اندر 300فیصد ودھان وچ کامیاب رہن گے تے اوہناں نوں 442کروڑ رُپئے ہور ملن گے۔ ایہدے نال نکیش اپنے پیسیاں نال پالو آلٹو نیٹ ورک دے 134کروڑ رُپئے دے شیئر مُل لے سکدے نیں تے اینی ای قیمت دے شیئر اوہناں نوں دتے جان گے جیہناں نوں اوہ ست ورھیاں تیکر ویچ نہیں سکن گے۔
سیلیکون ویلی وچ موجود ایس کمپنی دے شیئر وچ گراوٹ آئی اے۔ حالانکہ ایہ گراوٹ آس دے اُلٹ اے۔ کمپنی دے منافعے وچ پچھلے ورھے دے مقابلے وچ ایس چھماہی دوران 29فیصد وادھا ہویا اے۔ کمپنی دا ایہ منافع قیاس توں وی بہتر اے۔ نکیش اروڑہ نے مارک مک کوکلن دی تھاں لئی اے۔ مارکن 2011توں لے کے ایس ہفتے تیکر پالو آلٹو دا سی ای او سی۔ مارک کمپنی وچ بورڈ دا وائس چیئرمین رہوے گا جدکہ نکیش اروڑہ بورڈے دے چیئرمین وی ہون گے۔
کئی لوکاں لئی ایہ فیصلا حیران کن اے۔ کریڈٹ سوئس دے تجزیہ کار بریڈ زیلنک اوہناں لوکاں وچوں اک نیں۔ بریڈ نے فنانشل ٹائمز نوں دسیا کہ نکیش اروڑہ کول سائبر سکیورٹی دا تجربہ نہیں اے۔ ایہ وی آکھیا جا رہیا اے کہ نکیش اروڑہ کول کلاؤڈ تے ڈیٹا ڈیلنگ دا وڈا تجربہ اے تے سائبر سکیورٹی ڈیٹا اینا لسٹس دے مسئلے وچ ڈاڈھی طرحاں پھسی ہوئی اے۔چیتے رہوے کہ نکیش توں پہلاں سی ای او ٹم کک ٹیکنالوجی دی دنیا وچ سبھ توں ودھ تنخاہ لین والے سی ای او سی۔
