بھارت( پاکستان پوائنٹ نیوز31۔مئی2018ء ) شوہر نے اپنی ای بیوی دا ویاہ اوہدے بوائے فرینڈ کروا دتا۔ قومی اخبار دی اک رپورٹ مطابق بھارتی شہر کانپور وچ شوہر نے اپنی ای بیوی دا ویاہ اوہدے بوائے فرینڈ نال کروا دتا۔ ایس انوکھے ویاہ دے سوشل میڈیا اُتے وی چرچے ہو رہے نیں۔ سوشل میڈیا ورتیندڑاں دا کہنا ا ے کہ بھارتی شوہر نے اجیہا کم کیتا جو اج تیکر شاید نہیں ہو سکیا۔
غیر ملکی رپورٹس وچ دسیا گیا اے کہ بھارتی ریاست اتر پردیش دے شہر کانپور وچ رہن والے سچت عرف گولو دا ویاہ چالو (رواں) ورھے فروری نوں شانتی نامی کُڑی نال ہویا سی۔ گولودا شانتی نال ویاہ تے ہو گیا پر ویاہ مگروں شانتی گم سم تے پریشان ای رہن لگی سی۔ شانتی دے ایس عمل نوں اوہدے شوہر نے وی محسوس کیتا۔ ایہ صورتحال اوس ویلے بُہتی خراب ہوئی جدوں گولو دی نویں ویاہی بیوی کسے انجان موبائل نمبر توں آن والی فون کال اُتے لمیاں لمیاں گلاں کردی رہندی۔
جدوں گولو نے اپنی بیوی نوں ایس بارے پُچھیا تے شانتی نے اپنے شوہر نوں صاف صاف دس دتا کہ اوہ روی نامی مُنڈے نال پیاری کردی اے ، جو لکھنو دا رہن والا اے۔ شانتی ولوں حقیقت ساہمنے آن مگروں اوہدے خاوند نے غصہ کرن دی بجائے صبر کردے ہوئے اپنے ہور خاندان والیاں نال صلاح کیتی۔ جیہدے مگروں گولو نے اپنی بیوی دا ویاہ لکھنو دے روی نال کرن دا اعلان کیتا ۔ گولو ولوں ایہ اعلان صرف اعلان تیکر ای محدود نہ رہیا بلکہ گولو نے آپ ایس ویاہ وچ رلت کیتی تے ویاہ دے سارے انتظامات کرن توں وکھ ساریاں رسماں وی ادا کیتیاں۔
