ڈھاکا(پاکستان پوائنٹ نیوز15۔دسمبر۔2018ء) فاسٹ باؤلر مشرفی مرتضی بنگلا دیشی کرکٹ ٹیم دے سپر سٹار نیں پر اوہناں دا مننا اے کہ ہرکوئی پاکستانی کرکٹ ٹیم دے سابق کپتان تے موجودہ وزیر اعظم عمران خان جِنی اُچیائی اُتے نہیں جا سکدا اے۔ مشرفی مرتضی 30دسمبر نوں حکمران جماعت عوامی مسلم لیگ ولوں الیکشن لڑن جا رہے نیں تے اوہناں دا آکھنا اے کہ اوہ کھیڈاں تے چیریٹیز لئی کُجھ کرنا چاہندے نیں۔
اک انٹرویو دوران اوہناں دا آکھنا سی کہ ایمانداری دی گل اے کہ ہر کوئی محنت کرن مگروں ہمیشہ اوہ مقام حاصل نہیں کر سکدا جو عمران خان نے حاصل کر لیا اے۔ اوہناں دیاں خاہشاں محددو نیں تے اوہ اک کھڈاری ہون دے ناطے کھیڈاں لئی کُجھ کرنا چاہندے نیں ۔ اوہ اپنے ریجن لئی کُجھ چنگا کرن دی کوشش کرن گے۔ مشرفی مرتضی نارائل دی جنوب مغربی ڈسٹرکٹ توں تعلق رکھدے نیں جتھے اوہناں دی چیریٹی آرگنائزیشن ’نارائل ایکسپریس‘ نے ہسپتالاں نوں ایمبولینساں دین دے نال نال کساناں وچ چاؤلاں دے بیج ونڈے۔
یاد رہوے کہ جنوبی ایشیا وچ کھڈاریاں دا سیاست وچ آنا کوئی نویں گل نہیں ا ے پر مشرفی مرتضی ہن وی کرکٹ کھیڈ رہے نیں تے بنگلا دیشی ون ڈے کرکٹ ٹیم دی کپتانی کر رہے نیں جدکہ اوہناں نے اگلے ورھے ہون والا ورلڈ کپ کھیڈن دا اشارہ وی دتا اے۔
