لندن(پاکستان پوائنٹ نیوز05۔جون2017ء) اُنج تے مختلف ریسٹورنٹس کسٹمرز دی اپنے ول توجہ کران لئی نویاں نویاں ڈشاں تے کھانے متعارف کرواندے نیں پر لندن دے اک ریسٹورنٹ دے دلچسپ مینیو نے کھابیاں دے شوقین لوکاں دی توجہ اپنی ول کروا لئی اے۔ جی ہاں! لندن وچ موجود اک ریسٹورنٹ ’خیبر پاس‘ دے مینیو اُتے موجود کھانیاں دے ناں پاکستان دی موجودا سیاسی صورتحال دے ناواں توں رکھے گئے نیں۔
ایہناں دلچسپ ناواں وچ پاناما چکن لیگز، گو نواز گو ملائی بوٹی، دھرنا چکن پلیٹر، موٹو گینگ چکن پلیٹر، یوٹرن باربی کیو، ڈالر بے بی روسٹ تے ٹویٹ سویٹ رائس شامل نیں۔ ریسٹورنٹ دے مالک دا کہنا اے کہ اسیں کھانے راہیں پاکستان دی سیاسی صورتحال نوں لوکاں تیک پہنچان دی کوشش کیتی اے۔ ایس ریسٹورنٹ دے دلچسپ مینیو نوں ویکھدے ہوئے لوک اکثر ایس ریسٹورنٹ وچ کھانا کھاندے نیں۔
