(پاکستان پوائنٹ نیوز03۔جون2017ء) آکھیا جاندا اے کہ محبت تے جنگ وچ سبھ جائز ہوندا اے پر محبت نوں ثابت کرن لئی اج دی نوجوان نسل جو طریقا ورت رہی اے اوہ حیران کر دین والا اے۔تفصیل مطابق پچھلے دِنا ای اک بھارتی ہیکر نے اپنی گرل فرینڈ نال محبت دا اظہار کرن لئی پاکستانی یونیورسٹی دی ویب سائٹ نہ صرف ہیک کیتی بلکہ اوہدی شکل وی وگاڑ دتی۔ بھارتی ہیکر نے اسلامیہ یونیورسٹی دی نہ صرف ویب سائٹ ہیک کیتی بلکہ ویب سائٹ اُتے اپنی گرل فرینڈ لئی پیغام وی لکھیا۔
ویب سائٹ دے سکرین شاٹس توں پتا لگا اے کہ ایہ سائٹ وکی یاں وکرانٹ نامی اک بھارتی ہیکر نے ہیک کیتی۔ اپنے پیغام وچ ہیکر نے نہ تے کُڑی دا ناں لکھیا تے نہ ای ویب سائٹ نوں ہیک کرن دا مقصد دسیا پر آخیر وچ ویب سائٹ دے مالک توں معذرت کیتی۔ ویب سائٹ ہیک ہون دی خبر مگروں یونیورسٹی انتظامیا نے ایس حوالے نال کوئی بیان جاری نہیں کیتا۔
