گوجرانوالا(پاکستان پوائنٹ نیوز10۔جون2017ء) پاکستان نوں ایٹمی بنن د ا اعزاز حاصل اے۔ ایہ اعزاز ہر پاکستانی لئی فخر جوگ اے کہ اسلام دے ناں اُتے حاصل کیتا جان والا ملک اک ایٹمی طاقت بنیا۔ پاکستان نوں ایٹمی طاقت بنان وچ جتھے ایٹمی سائنسداناں نے ڈاڈھی محنت کیتی اوتھے گوجرانوالا دے اک لوہار دا کارناما وی ذکر جوگ اے۔ 1972وچ جدوں پاکستان دا ایٹمی پروگرام ڈاکٹر منیر احمد خان دی سربراہی وچ شروع ہویا تے پاکستانی سائنسداناں نے پہلا کم ایہ کیتا کہ ایٹمی ایندھن دی تیاری لئی کارآمد تابکار بنان والی مشین اُتے تحقیق شروع کیتی۔
ایہ مشین کچن وچ عام ورتی جان والی مدھانی دے اصول اُتے کم کردی اے۔ جس طرحاں مدھانی دُدھ وچ مکھن کڈھدی اے اوسے طرحاں ایہ مشین تابکار مواد نوں وکھ کردی اے۔ایہ عمل ایس مشین دے چنگے طریقے نال کم کرن تے تیز گھمن اُتے اے۔ ایہ گل ذکر جوگ اے کہ 1975وچ اک پاکستانی سائنسدان جی ۔اے۔عالم اپنے طور اُتے Gas Centrifugeبنا کے تیہ ہزار چکر فی منٹ اُتے گھمائی۔
اوہناں نے پہلے کدی وی ایہ مشین نہیں ویکھی سی پر ایہدے مگروں وی اوہناں نے نہ صرف اپنی کتابی معلومات دا ہور مطالعا کیتا بلکہ اک پیچیدا مشین بنا کے ایس مشین نوں کامیابی نال چلایا وی۔ جے۔ اے۔ ایم دا ڈیزائن کامیابی نال چل تے گیا پر فی منٹ 30ہزار چکر نہ کڈھے گئے۔ جے ایسے رفتار نال ایٹمی ایندھن بنانا شروع کیتا جاندا تے اوہدے لئی بہتا ویلا چاہیدا سی۔
ایٹمی ایندھن دی تیاری تے اوہدی مشین لئی پاکستان دے سارے وڈے سائنسداناں سِر جوڑ کے بِہ گئے تے سانجھے مشورے تے تجربیاں نال ایس مسئلے نوں حل کرن دی کوشش کیتی۔ سارے وڈے سائنسداناں نے کئی طریقاں نال حساب لایا پر کامیابی نہ مل سکی۔اصل مسئلا ویلے دا سی کیونکہ بھارت 1974وچ ای ایٹمی دھماکے کر چکیا سی تے اوہدی کوشش دے بعد ساڈے ایٹمی ایندھن بنان والی Gas Centrifugeنوں مسئلے پیش سن۔
سائنسداناں نے اک ہنگامی اجلاس سدیا جہدے وچ پاکستانی دے ریاضی دان، دھاتاں دے ماہر تے ایٹمی سائنسدان سارے رلتی سن۔ اجلاس دے رلتیاں نے ایس مشین دے نقشے، لیلکولیشن تے دھارتی مرکب سنے ہر شے دا جائزا لیا پر ایس مسئلے دا حل سمجھ نہ آیا۔ اجلاس وچ موجود کُجھ بندیاں نے اک عجیب تجویز پیش کیتی۔ اجلاس وچ مثال دتی گئی کہ جس طرحاں لا علاج روگی نوں جدوں ڈاکٹر کول دوائی نہیں ملدی تے اوہ حکیم، نجومی، عامل سنے کسے کول وی جان توں پرہیز نہیں کردا کیونکہ اوہنوں امید ہوندی اے کہ شاید کیتوں نہ کیتوں علاج ہو جائے تے میری جان نوں سکون مل جائے۔
ایسے طرحاں ساڈے کول وی ایس مسئلے دا حل نہیں اے تے اسیں ایس گل توں جانو نہیں آں کہ بھارت جدوں مرضی ایٹم بم نال ساڈے اُتے حملا کر سکدا اے۔ سانوں گوجرانوالا دے اک لوہار دا پتا اے جو جدی پشتی لوہار اے تے دھات دے ہر کم وچ ماہر اے۔ اوس لوہار توںودھ ماہر بندا اسیں نہیں ویکھیا۔
