اسلام آباد (پاکستان نیوزپوائنٹ 16مارچ2018ء) گهرو وزارت طرفان قومي اسيمبلي کي ٻڌايو ويو آهي ته سڄي ملڪ ۾ هيستائين 11 ڪروڙ 41 لک 92 هزار 450 شناختي ڪارڊز جاري ڪيا ويا آهن، بلاڪ شناختي ڪارڊ جي مسئلي تي ضلعي ڪميٽين کي فعال ڪردار ادا ڪرڻ جي حوالي سان خصوصي هدايت ڪئي ويندي، جمعي ڏينهن قومي اسيمبلي ۾ سوالن واري وقفي دوران ايس اي اقبال قادري جي سوال جي جواب ۾ گهرو وزارت طرفان ٻڌايو ويو آهي ته ڪراچي جي ميگا سينٽرز طرفان گذريل 6 مهينن جي دوران اورنگي ٽائون سان تعلق رکندڙن کي ڪل 17042 شناختي ڪارڊ جاري ڪيا ويا ۽ 39 ماڻهن جي شناختي ڪارڊن جي تجديد ڪئي وئي، پوري ملڪ ۾ 7 جڏهن ته ڪراچي ۾ هڪ ميگا سينٽر ڪم ڪري رهيو آهي، عبدالستار بچاڻي جي سوال جي جواب ۾ گهرو پارلياماني سيڪريٽري ڊاڪٽر محمد افضل ڍانڍلا چيو ته پوري ملڪ ۾ 550 نادرا رجسٽريشن سينٽر ڪم ڪري رهيا آهن، اليڪشن کان اڳ اسان نادرا کي وقت ۽ عملي جي تعداد ۾ اضافو ڪرڻ جي هدايت ڪنداسين، ڊپٽي اسپيڪر هدايت ڪئي ته نادرا جي موبائيل وينن جي تعداد ۾ اضافو ڪيو ويندو ته جيئن اليڪشن کان اڳ وڌ کان وڌ ماڻهو شناختي ڪارڊ ٺاهرائي سگهن. ڊپٽي اسپيڪر چيو ته پارلياماني ڪميٽي 60 ڏينهن جي مهلت ڏني هئي ته ان جي رپورٽ گهرو وزارت ايوان ۾ پيش ڪري، پارلياماني ڪميٽي ميڪنزم جوڙي ڇڏيو آهي، بلاڪ شناختي ڪارڊن جو مسئلو جلد حل ٿيڻ گهرجي، قومي اسيمبلي کي ٻڌايو ويو ته نادرا عام شناختي ڪارڊ 30 ڏينهن ۾ فوري 15 ڏينهن جڏهن ته ايگزيڪيٽو 7 ڏينهن ۾ جاري ڪيو ويندو آهي، چئني صوبن، آزاد ڪشمير، فاٽا ۽ گلگت بلتستان ۾ ماڻهن کي 114192450 شناختي ڪارڊ جاري ڪيا ويا آهن، ضمني سوال جي جواب ۾ گهرو پارلياماني سيڪريٽري ڊاڪٽر محمد افضل ڍانڍلا چيو ته بلاڪ شناختي ڪارڊن جو معاملو ضلعي ڪميٽين ڏانهن هليو ويو آهي. ڊپٽي اسپيڪر چيو ته پارلياماني ڪميٽي فيصلو ڪيو آهي ته 8 ڪاغذن مان ڪو هڪ ڪاغذ فراهم ڪرڻ سان به رجسٽريشن ٿي ويندي آهي، هڪ سوال جي جواب ۾ پارلياماني گهرو سيڪريٽري چيو ته صرف تصديق ڪرڻ سان رجسٽريشن ناهي ٿيندي، ڪاغذن جي فراهمي ضروري آهي، ايوان تصديق جو خانو ڪڍڻ جي حوالي سان قانونسازي ڪري ته ان تي عملدرآمد ڪري سگهجي ٿو، هڪ سوال جي جواب ۾ پارلياماني سيڪريٽري چيو ته غير ملڪين کي شناختي ڪارڊ جاري ڪرڻ جي ڪا پاليسي نه آهي.
سڄي ملڪ ۾ هيستائين 11 ڪروڙ 41 لک 92 هزار 450 شناختي ڪارڊز جاري ڪيا ويا آهن: گهرو وزارت
6 سال پھريان
