آپريشن ضرب عضب کانپوءِ هٿيارن جي اسمگلنگ ۾ ڪافي حد تائين گهٽتائي آئي آهي: گهرو وزارت

اسلام آباد (پاکستان نیوزپوائنٹ 16مارچ2018ء) گهرو وزارت طرفان قومي اسيمبلي کي ٻڌايو ويو آهي ته آپريشن ضرب عضب کانپوءِ هٿيارن جي اسمگلنگ ۾ ڪافي حد تائين گهٽتائي آئي آهي، پاڪ ايران سرحد ۽ ساحلي پٽي سان 79 پوسٽون قائم ڪيون ويون آهن. جمعي ڏينهن قومي اسيمبلي ۾ سوالن واري وقفي دوران شاهده رحماني جي سوال جي جواب ۾ گهرو پارلياماني سيڪريٽري ٻڌايو ته جڏهن کان آپريشن ضرب عضب شروع ٿي آهي هٿيارن جي اسمگلنگ تي ڪافي حد تائين قابو آندو ويو آهي، ان سلسلي ۾ پاڪ ايران سرحد ۽ ساحلي پٽي سان گڏ 79 کان وڌيڪ پوسٽون قائم ڪيون ويون آهن، هڪ ٻي سوال جي جواب ۾ هن چيو ته اسان جي دور ۾ آٽو ميٽڪ هٿيارن جا لائسنس ختم ڪيا ويا آهن، ٻيا هٿيار لائسنس جي تصديق کانپوءِ جاري ڪيا پيا وڃن. ميان عبدالمنان جي سوال جي جواب ۾ ڊاڪٽر محمد افضل ڍانڍلا چيو ته اسان آٽوميٽڪ هٿيارن جي لائسنس تي پابندي جو فيصلو ڪيو هو تنهن هوندي به لاهور هاءِ ڪورٽ ان حوالي سان منع نامو جاري ڪري رکيو آهي، سيد وسيم حسين جي سوال جي جواب ۾ گهرو پارلياماني سيڪريٽري ڊاڪٽر محمد افضل ڍانڍلا چيو ته ميمبر جي ذاتي تحفظ لاءِ هٿيارن جا لائسنس رد نه ڪرڻ جي تجويز حڪومت کي ياد ڏيارينداسين.