سردار اياز صادق پاران تعليم واري وزير جي خلاف وزيراعظم کي خط لکڻ جي هدايت

اسلام آباد (پاکستان نیوز پوائنٹ 09 اگست2016ء) قومي اسيمبلي جي اسپيڪر سردار اياز صادق تعليم واري وزير جي ايوان ۾ غير موجودگي جو سخت نوٽيس وٺندي وزيراعظم کي خط لکڻ جي هدايت ڪئي آهي، جڏهن ته وفاقي اردو يونيورسٽي جي استادن ۽ عملي جي پگهارن جي عدم ادائيگي جي حوالي سان ڌيان ڇڪايو نوٽيس ملتوي ڪيو ويو. اڱاري ڏينهن قومي اسيمبلي جي اجلاس ۾ جماعت اسلامي جي صاحبزاده محمد يعقوب وفاقي اردو يونيورسٽي جي استادن ۽ عملي جي پگهارن جي عدم ادائيگي جي حوالي سان ڌيان ڇڪايو نوٽيس پيش ڪرڻ چاهيو پر وفاقي وزير شيخ آفتاب احمد چيو ته لاڳاپيل وزير هن وقت ايوان ۾ موجود نه آهي، ڌيان ڇڪايو نوٽيس ڪجهه دير لاءِ ملتوي ڪيو وڃي، ان تي اسپيڪر سردار اياز صادق ڪاوڙ جو اظهار ڪندي چيو ته پارليامينٽ کان وڌيڪ ڪو به اهم نه آهي، ان تي وفاقي وزير شيخ آفتاب احمد چيو ته پارلياماني پارٽي جي اجلاس ۾ ان حوالي سان کلي ڳالهايو ويو، ان تي اسپيڪر چيو ته وزيراعظم کي ان حوالي سان لکي موڪليو وڃي ته وزير ايوان ۾ موجود ناهن هوندا، ان کانپوءِ ڌيان ڇڪايو نوٽيس ملتوي ڪيو ويو.