نویں دِلی(پاکستان پوائنٹ نیوز06۔فروری2017ء) بھارت نے آکھیا اے کہ پاکستان وچ ایس حوالے نال ریفرنڈم ہونا چاہیدا اے کہ اوہدے شہری اوتھے رہنا چاہندے نیںیاں بھارت نال، بھارت ہمیشہ توں پرامن تعلقات قائم کرنا چاہندا اے پر ایہ پاکستان ای اے جو ایہناں تعلقات وچ وگاڑ چاہندا اے، اوہناں نوں دہشت گرداں تے اوہناں لوکاں نوں روکنا چاہیدا جو کشمیر وچ ریفرنڈم دا مطالبا کر رہے نیں، ہن دنیا بھارت نوں اک کمزور ملک دے طور اُتے نہیں مِتھدی، سرجیکل سٹرائیکس راہیں اسیں دنیا نوں وکھا دِتا اے کہ اسیں وی مضبوط ایکشن لے سکدے آں، بھارت امن پسند اے پر ہن اوہ کوئی کمزور ملک نہیں اے، جے کسے نے سانوں چھویا وی تے اسیں اوہناں نوں نہیں چھڈاں گے۔
غیر ملکی خبر رساں ادارے دے مطابق پچھلے دیہاڑے ریاست اتر کھنڈ دے شہر ہریدوار وچ اک عوامی جسلے نال خطاب کردے ہوئے بھارتی وزیر داخلا راج ناتھ سنگھ دا ہور کہنا سی کہ کشمیر ہمیشہ توں ہندوستان نال سی تے اوہدا حصہ رہوے گا۔ راج ناتھ سنگھ دا کہنا سی کہ ہن پاکستان کشمیر اُتے ریفرنڈم چاہندا اے، پر اک گل واضح اے کہ کشمیر ہندوستان نال سی تے ہندوستان نال رہوے گا تے کوئی وی طاقت اوہنوں بدل نہیں سکدی، ایہدے اُلٹ پاکستان وچ ریفرنڈم ہونا چاہیدا ، جہدے وچ پُچھیا جائے کہ اوہدے شہری اوسے ملک وچ رہنا چاہندے نیں یاں ہندوستان نال۔
