تہران(پاکستان پوائنٹ نیوز02۔فروری2017ء) ایران نے بیلسٹک میزائل دا تجربا کرن دی تصدیق کردے ہوئے آکھیا اے کہ اوہدا ایہ کم 2015وچ عالمی طاقتاں ولوں کیتی گئی نیو کلیئر ڈیل دی خلاف ورزی نہیںاے۔ غیر ملکی میڈیا دے مطابق ایران دے وزیر خارجا حسین دہقان دا ایہ بیان اقوام متحدا دے سلامتی کونسل دے اجلاس مگروں ساہمنے آیا، جہدے وچ ایران دے پچھلے دِنا میزائل تجربے اُتے وچار وٹاندرا کیتا گیا۔
یاد رہوے کہ امریکا نے ایس تجربے نوں بالکل نہ قبول جوگ قرار دِتا سی۔ حسین وہقان دے مطابق ایہ تجربا ایران دی دفاعی طاقت وچ وادھے لئی کیتا گیا جدکہ اوہدا مقصد نیو کلیئر ڈیل یاں قرار داد 2231دی خلاف ورزی نہیں۔ یاد رہوے کہ اقوام متحدا دے سلامتی کونسل دی قراداد 2231ایران نوں جوہری مواد نوں لے جان والے میزائل دی تیاری توں روکدی اے۔ وزیر خارجا دے مطابق تجربا جاری پروگرام دا حصہ سی۔
اوہناں دا کہنا سی کہ اسیں پہلے ای اعلان کر چکے آں کہ دفاعی سامان بنان دی تیاری لئی اپنے طے کیتے گئے پروگرام اُتے عملدرآمد کراں گے، ایہ پروگرام ایران دے قومی مفاد تے مقصداں لئی اہم اے جدکہ دفاعی معاملات وچ بیرونی عناصر نوں دخل دین دی اجازت نہیں ہووے گی۔ یاد رہوے کہ ایران دا بیلسٹک میزائل پروگرام پچھلے ورھے جنوری توں ہون والی ڈیل مگروں ای مغرب لئی اعتراض دی وجہ بنیا رہیا۔
