نویں دِلی(پاکستان پوائنٹ نیوز30۔نومبر۔2018ء) کرتارپور راہداری دے افتتاح لئی پاکستان آن والی بھارتی وزیر واپس جا کے زہر بکن لگی، یونین وزیر برائے خوراک ہرسمرت کور بادل نے نوجوت سنگھ سدھو نوں پاکستان دا جاسوس قرار دے دتا، سدھو نوں بھارت توں ودھ پاکستان وچ پیار ملدا اے تے عمران خان نے اوہناں نوں الیکشن لڑن دی آفر وی کیتی اے، ایس معاملے اُتے کانگریس دے لیڈر راہول گاندھی نوں اپنی پوزیشن واضح کرنی چاہیدی۔
تفصیل دے مطابق پرسوں وزیراعظم عمران خان نے کرتارپور راہداری دا نینہ پتھر(سنگ بنیاد) رکھیا۔ایس موقعے اُتے اک خوبصورت تقریب دا وی آہر کیتا گیا ۔ تقریب وچ وزیر خارجا شاہ محمود قریشی، وزیر اعلا پنجاب عثمان بزدار وی موجود سن۔تقریب وچ بھارتی سرکاری وفدتے وزیر اعظم دے بیلی سدھو وی موجود سن۔پر ہن کرتارپور راہداری دے افتتاح لئی پاکستان آن والی بھارتی وزیر واپس جا کے زہر بکن لگی اے۔
یونین وزیر برائے خوراک ہرسمرت کور بادل نے نوجوت سنگھ سدھو نوں پاکستان دا جاسوس قرار دے دتااے۔اوہناں دا آکھنا سی کہ سدھو نوں بھارت توں ودھ پاکستان وچ پیار ملدا اے تے عمران خان نے اوہناں نوں الیکشن لڑن دی آفر وی کیتی اے۔ ایس معاملے اُتے کانگریس دے لیڈر راہول گاندھی نوں اپنی پوزیشن واضح کرنی چاہیدی۔ پاکستان توں واپسی اُتے اٹاری وچ میڈیا گل بات کردے ہوئے سوانی وزیر نے سدھو دے تن دن پاکستان وچ لنگھان اُتے وی اوہناں نوں تنقید دا نشانہ بنایا تے آکھیاکہ اوہ گوپال چاولا نال اپنی تصویر دا حساب دین۔ کانگریس توں منگ کیتی جا رہی اے کہ اوہ نوجوت سنگھ نوں پارٹیوں کڈھے۔
