پائلٹ دا اُڈان وچ اُستاد دے سفر کرن دا پتا چلدے ای قابل تحسین اقدام

پائلٹ دا اُڈان وچ اُستاد دے سفر کرن دا پتا چلدے ای قابل تحسین اقدام

استنبول(پاکستان پوائنٹ نیوز30۔نومبر۔2018ء) انسان زندگی وچ چاہے جِنی وی ترقی کرلووے اوہدے پچھلے بُہتا ہتھ اوہدے اُستاداں دا ای ہوندا اے۔ تے بھاگاں والے ہوندے نیں اوہ لوک جو اپنے اُستاداں نوں ہمیشہ یاد رکھدے نیں۔ سوشل میڈیا اُتے اک ویڈیو وائرل ہو رہی اے جیہدے وچ ویکھیا جا سکدا اے کہ ترکش ائر لائن دے اک پائلٹ نے اُڈان دوران اپنے اُستاد نوں انوکھے انداز وچ خراج تحسین پیش کیتا اے۔میڈیا رپورٹس وچ دسیا گیا اے کہ جدوں پائلٹ نوں پتا لگا کہ ایسے اُڈان وچ اوہدا اُستاد وی سفر کر رہیا اے، اوہنے اپنے اُستاد دا شکریہ ادا کرن تے خراج تحسین پیش کرن دا آہر کیتا۔ پائلٹ نے جہاز دے عملے نوں گلدستے دے کے اُستاد دی سیٹ کول گھلیا تے آپ کاک پٹ توں مائیک راہیں اوہناں نوں مخاطب کر کے شکریہ ادا کیتا تے نال ای اپنی کامیابی دا سارا کریڈٹ وی اُستاد نوں دتا۔

    


اپنے شاگرد ولوں تشکر دا اظہار سُن کے اُستاد دیاں اکھاں وچ وی پانی آ گیا ۔ ایس موقعے اُتے جہاز وچ موجود مسافر وی جذباتی نظر آئے۔ آخیر اُتے پائلٹ نے آپ وی اپنے اُستاد کول آکے اوہدے نال محبت دا اظہار کیتا۔