سابق بھارتی کرکٹر و وزیر نوجوت سنگھ سدھو خلاف بھارت وچ محاذ کھل گیا

سابق بھارتی کرکٹر و وزیر نوجوت سنگھ سدھو خلاف بھارت وچ محاذ کھل گیا

بھارت(پاکستان پوائنٹ نیوز04۔دسمبر۔2018ء) سابق بھارتی کرکٹر و بھارتی وزیر نوجوت سنگھ سدھودے خلاف اک ہور محاذ کُھل گیا۔ بھارتی وزیر دے وزیر اعظم پاکستان عمران خان دی تقریب حلف برداری وچ رلت کرن مگروں بھارتی میڈیا نے اوہناں نوں تنقید دا نشاہ بنایا جیہدے مگروں کرتارپور راہداری دا نینہ پتھر رکھن دی تقریب وچ مرکزی مہمان دے طور اُتے رلت کرن اُتے وی نوجوت سنگھ سدھو نوں تنقید دا نشانہ بنایا گیا۔

ایس بارے کئی بھارتی سیاستداناں نے پاکستان جان تے کرتارپور راہداری دا نینہ پتھر(سنگ بنیاد) رکھن دی تقریب وچ نوجوت سنگھ سدھو دی رلت اُتے تحفظات دا اظہار کیتا۔ کرتار پور راہداری دا نینہ پتھر رکھے جان مگروں ایہ خیال کیتا جا رہیا سی کہ بھارتی وزیر نوجوت سنگھ سدھو نوں ایس بنیاد اُتے آؤندے الیکشن وچ بہت مقبولیت ملے گی تے عین ممکن اے کہ اوہ بھارتی پنجاب دے اگلے وزیر اعلا ہون۔

پر ہن بھارتی شہر لدھیانہ وچ بھارتی وزیر خلاف اک نواں محاذ کُھل گیا اے۔ بھارتی پنجاب دے شہر لدھیانہ وچ وزیر اعلا امریندر سنگھ دی حمایت وچ ہور ڈنگزبورڈ زلادتے گئے نیں۔ایہ ہورڈنگز بورڈزپنجاب دے وزیر اعلا امریندر سنگھ دے حامی کانگریس دے کارکناں ولوں لائے گئے نیں۔ ہورڈنگز بورڈز اُتے ’پنجاب دا کیپٹن، ساڈا کیپٹن‘ لکھے جان دے نال نال بھارتی پنجاب دے وزیر اعلا امریندر سنگھ ، راہول گاندھی تے سونیا گاندھی دیاں تصویراں وی لائیاں گئیاں نیں۔ایتھے ایہ گل ذکر جوگ اے کہ بھارتی پنجاب دے وزیر اعلا امریندر سنگھ نے کرتارپور راہداری دے نینہ پتھر رکھن دی تقریب وچ رلت اُتے نوجوت سنگھ سدھو نوں تنقید دا نشانہ بناندے ہوئے اوہناں دے ایس فیصلے دی مخالفت کیتی سی۔