راجھستان(پاکستان پوائنٹ نیوز24۔جنوری2017ء) بھارتی ریاست راجھستان دے اک سکول دے نِکے نِکے پڑھیاراں نے ساریاں نوںاوس ویلے حیران کر دِتاجدوں اوہناں نے اک معذور بالڑی نوں وہیل چیئر مُل لین لئی اپنی پاک منی عطیہ کر دِتی۔ سارے بالاں دی اوس بالڑی نال اک تقریب وچ ملاقات ہوئی۔ تفصیل دے مطابق سری نگر وچ موجود اک نجی سکول وچ 10ورھیاں دی بالڑی اوشہ، جو کہ اک کسان دی دھی اے نے اک تقریب وچ رلت کیتی۔
اوشہ اک سرکاری سکول وچ پڑھ رہی اے پر اوہ تقریب وچ نجی سکول دے اک واقف کار نال آئی سی۔ تقریب دے کُجھ دن بعد جدوں دوجی جماعت دی اک پڑھیارن نے اک معذور سوانی نوں سکوٹر چلاندے ویکھیا تے اوہنوں چھیتی نال اوشہ دا خیال آیا۔ اوہنے ایہ گل اپنے دادے نال کیتی جہنے اوہنوں مشورا دِتا کہ جے اوہ معذور بالڑی دی مدد کرنا چاہندی اے تے اپنی پاکٹ منی وچوں اوہدی مدد کر سکدی اے۔
جہدے بعد کیاتی ناں دی ایس کُڑی نے اپنے کلاس فیلوز نال ایہ خیال شیئر کیتا، جہدے مگروں سارے بالاں نے وی اوشہ دی مدد کرن لئی ایکتا دا اظہار وکھالا کردے ہوئے انفرادی طور اُتے 100تے 1000رُپئے دینے دے بعد اکٹھے کیتے گئے پیسےاں نال اوشہ لئی اک وہیل چیئر مُل لئی۔ سکول انتظامیا نے بالاں دے ایس جذبے نوں ڈاڈھا سلاہیا۔ سکول دے ڈائریکٹر وقاق شرما نے آکھیا کہ اسیں بالاں نوں اک فلاحی کم لئی پیسے اکٹھے کردے ویکھیا تے اسیں وی کُجھ پیسے عطیہ کر دِتے۔
