نویں دِلی(پاکستان پوائنٹ نیوز24۔جنوری2017ء) مودی سرکار اپنی حکومت دیاں ناکامیاں لُکان لئی سارا ملبہ پاکستان اُتے سُٹن لگی، ملک اندر ودھدے ٹرین حادثیاں دی ذمے واری پاکستان اُتے پا دِتی۔ میڈیا رپورٹس دے مطابق مودی سرکار اپنی مَندی کارکردگی دا ذمے وار پاکستان نوں ٹھہران لگی، آئے دن ٹرین حادثیاں وچ شہریاں د ی موت اُتے ذمے واراں خلاف کارروائی کرن دی بجائے اپنے شہریاں نوں بے وقوف بناندے ہوئے حادثیاں دا ذمے وار پاکستان نوں قرار دے دِتا۔
بھارتی میڈیا وی مودی سرکار دے نال نال غلط رپورٹنگ راہیں شہریاں دے زخمیاں اُتے لون لان وچ رُجھ گیا۔ بھارتی میڈیا نے ہن آکھیا کہ پاکستان نے بھارت اندر ٹرین حادثے کروا کے دہشت گردی دا نواں طریقا لبھ لیا اے۔ یاد رہوے کہ پچھلے دِنا بھارتی ریاست آندھرا پردیش اندر ٹرین حادثے دے نتیجے وچ 40بندے ہلاک جدکہ نومبر وچ ہون والے ٹرین حادثے وچ 140بندے ہلاک ہو گئے سن۔ ایس توں وکھ دوجے پاسے بھارتی تحقیقاتی اداریاں نے ذکر کیتے گئے معاملے دا ذمے وار ٹھہراندے ہوئے کُجھ بندیاں نوں گرفتار کر کے پاکستانی ایجنڈ ظاہر کیتا اے۔
