کبوتر مگروں ہن بھارتی حکام تے لوکائی کتے توں ڈر گئی: بھارتی ٹی وی دی مضحکہ خیز رپورٹ

نویں دِلی(پاکستان پوائنٹ نیوز24۔جنوری2017ء) بھارت اکثر ای اپنی بھونڈی تے مضحکہ خیز رپوٹاں دے نتیجے وچ خبراں دی زینب بنیا رہندا اے۔ اک پاسے بھارتی وزیر اعظم نریندر مودی پاکستان نال دوستی دا ہتھ ودھاندے نیں تے دوجے پاسے بھارتی حکام پاکستان نوں دھمکیاں دینوں باز نہیں آﺅندے۔ بھارت ولوں کبوتر تے طوطے پھڑ کے اوہناں نوں پاکستانی جاسوس ثابت کرن دی مضحکہ خیز کوششاں اجے سارے بُھلے وی نہیں سن کہ بھارت نے اک ہور بھونڈا دعوا کر دِتا اے۔ جی ہاں‘ بھارتی ٹی وی چینل اُتے چلن والی اک رپورٹ اندر دسیا گیا کہ پاکستان دی خفیہ ایجنسی بھارت اُتے حملا کرن لئی پالتو کتیاں دا سہارا لے سکدی اے۔ اپنی رپورٹ وچ بھارتی ٹی وی چینل دا کہنا س کہ ساڈے وسیلیاں نے سانوں ایہ گل کنفرم کیتی اے کہ پاکستان کتیاں دی مدد نال بھارت اُتے دہشت گرد حملیاں دی منصوبا بندی کر رہیا اے، ایہو نہیں ٹی وی چینل دے رپورٹر نے شہریاں نوں خبردار کیتا کہ اوہ کسے کتے یاں اوہدے نال موجود مرد یاں سوانی نوں مشکوک حالت وچ ویکھن تے چھیتی ای پولیس نوں اطلاع دین کیونکہ دہشت گرد پالتو جنوراں نوں آپ مارو دھمکیاں وچ ورت سکدے نیں۔ ایہ تے سی بھارتی ٹی وی چینل دی مضحکہ خیز رپورٹ دی تفصیل۔ ایس رپورٹ دے سوشل میڈیا اُتے وائرل ہون مگروں بھارت اک وار فیر آپے ای جگ دا ہاسا بند رہیا اے۔ بھارت ٹی وی چینل دی رپورٹ تسیں وی ویکھو!