واشنگٹن(پاکستان پوائنٹ نیوز24۔جنوری2017ء) امریکی سی آئی اے ولوں جاری کیتیاںگئیاں دستاویزات وچ انکشاف ہویا اے کہ 1971دی پاک بھارت جنگ دوران امریکا مداخلت کرنا چاہندا سی پر انٹیلی جنس معلومات دی کمی پاروں انج نہ کر سکیا۔ غیر ملکی خبر رساں ادارے دے مطابق امریکا دی سینٹرل انٹیلی جنس ایجنسی ولوں تقریبن اک کروڑ 30لکھ صفحیاں اُتے مشتمل خفیہ دستاویزات نوں پہلی وار انٹرنیٹ اُتے جاری کیتا گیا اے۔
ایہناں دستاویزات دے جائزے توں ایہ گل ساہمنے آئی اے کہ 1971وچ جدوں پاکستان تے بھارت وچکار بنگلا دیش دے حوالے نال کشیدگی سی اوس ویلے دے نیشنل سکیورٹی ایجنسی دے مشیر ہنری کسنجر نے 24نومبر 1971نوں اک خفیہ اجلاس سَدیا سی۔ اجلاس وچ ہنری کسنجر نے سی آئی اے دے سربراہ نال خفگی دا وکھالا کردے ہوئے آکھیا سی کہ ساڈے کول انٹیلی جنس معلومات دی کمی اے تے ایہو وجہ اے کہ اسیں سفارتی طور اُتے کجھ کرن جوگ نہیں آں۔ امریکا چاہندا سی کہ خطے وچ ایس بحران نوں چھیتی حل کر لیاجائے تاں جے روس دا اثر و رسوخ نہ ودھے تے ایس بحران نوں ٹالن لئی امریکا نال کم کرن نوں تیار ہو جائے۔
