واشنگٹن(پاکستان پوائنٹ نیوز24۔جنوری2017ء) امریکا دے سابق صدر اوباما نے آکھیا اے کہ وائٹ ہاﺅس وچ ٹشو پیپر مفت نہیں ملدے سن بلکہ مُل لینے پیندے سن، ٹوتھ پیسٹ تے اورنج جوس وی مفت نہیں ملداسی،ہر مہینے دے آخیر اُتے گھر دا خرچا دینا پینداسی، چھٹیاں وی اپنے خرچے اُتے ہوندیاں نیں۔ ایہ سارے انکشافات سابق امریکی صدر باراک اوباما نے اک پرچا کار نال گل بات کردے ہوئے کیتے۔
اوہناں نے دسیا کہ وائٹ ہاﺅس وچ اوہ اپنی تے اپنے گھر والیاں دی ذاتی ورتوں دیاں شیواں اپنے پیسیاں توں مُل لیندے سن۔ پرچا کار نے سوال کیتا کہ آخری وار کدوں اپنی جیب توں خرچا کیتا ، جہدے اُتے اوہناں نے جواب دِتا کہ اک شے جو مینوں بے چین رکھدی سی اوہ ایہ کہ لوک کیہ آکھدے ہون گے کہ جدوں اسیں چھٹیاں اُتے ہوندے آں لوکائی دے ٹیکس اُتے مزے اُڈا ندے آں پر انج نہیں میں ایس بارے سارے خرچے آپ برداشت کرنا ساں۔
اوہناں نے ہور دسیا کہ واحد شے جہدے لئی خرچا نہیں کردا سی اوہ سیکریٹ سروس دا جہاز تے رابطے، کیونکہ میرا اوہناں اُتے کوئی اختیار نہیں سی۔ ہر مہینے دے آخیر اُتے مینوں گروسری دا بل دینا پیندا سی پر ایہ وی سچ اے کہ میرا پرس کئی وار میرے کول ای ہوندا سی۔ اک سوال دے جواب وچ اوہناں نے دسیا کہ اوہ اپنی بیوی مشیل نال کُجھ ویلا لنگھان گے، اوہناں نوں کُجھ کم انج دے کرنے نیں جو اوہ رُجھاں پاروں نہیں کر سکے۔
