واشنگٹن(پاکستان پوائنٹ نیوز23۔دسمبر2016ء) کرسمس دوران حدوں زیادا انٹرنیٹ براﺅزنگ، گھر والیاں تے چھٹیاں دیاں تصویراں ویکھن نال لوک دُکھی ہو سکدے نیں۔ برطانوی نشریاتی ادارے نے کوپن ہیگن یونیورسٹی ولوں کیتی گئی تحقیق دے حوالے نال دسیا کہ سوشل میڈیا دا حدوں زیادا استعمال حسد دا احساس پیدا کر سکدا اے۔ ایس تحقیق وچ خاص طور اُتے خبردار کیتا گیا اے کہ کسے نال گل کیتے بغیر سوشل میڈیا دی صرف براﺅزنگ کرن دے منفی اثرات پین گے۔
لوکاں نوں ایس حوالے نال آکھیا گیا اے کہ موقع ملے تے سوشل میڈیا توں بریک لِتا جائے۔ ایس تحقیق وچ اک ہزار بندے جہناں وچ زیادا سوانیاں شامل سن، نال گل بات کیتی گئی۔ تحقیق وچ آکھیا گیا اے کہ سوشل میڈیا دی مسلسل ورتوں خاص طور اُتے فیس بک ورتیندڑاں دی زندگی دے حوالے نال خیالات تے جذبات اُتے منفی اثرات پیندے نیں۔ تحقیق کاراں دا کہنا اے کہ دوجے لوکاں دیاں سوشل میڈیا کہانیاں اُتے حدوں زیادا ویلا لنگھان نال موڈ خراب تے حسد پیدا ہو سکدا اے پر تحقیق وچ آکھیا گیا اے کہ سوشل میڈیا اُتے دوجے بندیاں نال گلاں کرن نال صحت اُتے چنگا اثر پیندا اے۔ تحقیق وچ ہور آکھیا گیا اے کہ اپنی زندگی نوں بہتر بنان لئی اک طریقہ کار وی اے کہ اک ہفتے لئی سوشل میڈیا نوں چھڈ دِتا جائے۔
