واشنگٹن(پاکستان پوائنٹ نیوز23۔دسمبر2016ء) امریکی حکومت نے غیر ملکی مسافراں دے سوشل میڈیا اکاﺅنٹس بارے پُن چھان شروع کر دِتی۔ تفصیل دے مطابق امریکا جان والے غیر ملکیاں نوں سوشل میڈیا اکاﺅنٹس بارے امریکی پولیس حکام نوں وضاحت دینی پئے گی۔ ایہ ساریاں تفصیلاں ویزا ویور پروگرام (VWP) دے تحت آن والے مسافراں توں منگیاں جان گیاں جہدے وچ اوہناںدے سوشل میڈیا اکاﺅنٹس جویں کہ فیس بک تے ٹویٹر شامل نیں۔
سی بی ایس نیوز دے مطابق ایہ اقدام آن والے ویلے وچ سکیورٹی خدشیاں نوں روکن تے اوہناں وچ نمایاں کمی لیان لئی کیتا گیا اے، مینجمنٹ تے بجٹ آفس نے چالو ورھے سوشل میڈیا اکاﺅنٹس بارے تفصیلاں منگن دے سوالاں دی منظوری دِتی اے پر ایس سوال نوں الیکٹرانک سسٹم آف ٹریول آتھرائزیشن (ESTA)دے تحت سفر کرن والے مسافراں لئی اختیاری رکھیا گیا اے۔ ایس سوال دا جواب دینا صرف ویزا ویور پروگرام دے تحت سفر کرن والے مسافراں لئی ای ضروری اے۔
ایس پروگرام دے تحت 38ملکاں دے شہری امریکا دا سفر کرن دے نال نال بغیر ویزا 90دن تیکر امریکا وچ رہ سکدے نیں۔ امریکی کسٹمز تے بارڈر پروٹیکشن (سی بی پی) نے چالو ورھے جون وچ ایہ تجویز پیش کیتی سی جہدے بعد ٹیکنالوجی تے پرائیویسی دے سرگرم کارکناں ولوں کئی مہینیاں تیکر مخالفت وی کیتی گئی۔ ایس تجویز نوں ہوم لینڈ سکیورٹی دے محکمے نے کُجھ دن پہلے ای منظور کیتا۔ فارم وچ شامل کیتا گیا سوال Please enter information associated with your online presence-Provider/Platform-Social media indentifierاے۔
