برلن حملا، ٹرک توں مشتبہ ملزم دیاں انگلیاں دے نشان مل گئے

ٹرک دے کیبن وچوں مشتبہ تیونسی باشندے انیس عامری دیاں انگلیاں دے نشان ملے نیں:جرمن وزیر داخلا

برلن(پاکستان پوائنٹ نیوز23۔دسمبر2016ء) جرمن پولیس ایس ویلے مختلف جرمن شہراں وچ مشتبہ تیونسی باشندے انیس عامری دی گرفتاری لئی چھاپے ما رہی اے۔ حملے وچ ورتے جان والے ٹرک توں اوہدیاں انگلیاں دے نشان ملن دی تصدیق کر دِتی گئی اے۔ غیر ملکی خبر رساں ادارے دے مطابق جرمن وزیر داخلا تھوماس ڈے میزیئر نے آکھیا اے کہ جس ٹرک نال برلن دی کرسمس مارکیٹ اُتے حملا کیتا گیا سی اوہدے کیبن وچوں مشتبہ تیونسی باشندے انیس عامری دیاں انگلیاں دے نشان ملے نیں۔

ڈے میزیئر دے مطابق ایہ نشاناں توں پتا لگدا اے کہ عامری ای ایس حملے دامرکزی ملزم ہو سکدا اے۔ جرمن وزیر داخلا نے ایہناں نشاناں نوں مبینہ حملا آور دے حوالے نال اہم معلومات قرار دِتا اے۔ اوہناں دے مطابق کُجھ وادھو ثبوت وی ملے نیں، پر اوہناںولوں ایس بارے ہور تفصیل نہیں دِتی گئی۔ پولیس نے اک جنوبی جرمن شہر ہائل برون دے بس سٹینڈ اُتے کھلوتی بس دی تلاشی لئی، مقامی اخبار دے مطابق ویکھن وچ ایہ چھاپا مشتبہ تیونسی باشندے دی گرفتاری دے سلسلے وچ ماریا گیا سی۔ ہائل برون دی بس وچوں وی عامری دی گرفتاری ممکن نہیں ہو سکی۔