لندن(پاکستان پوائنٹ نیوز14۔دسمبر2016ء) باکسر عامر خان دے ماں پیو دے انٹرویو دے بعد اوہناں دی نوہ تے عامر دی بیوی دا سخت ردعمل ساہمنے آ گیا۔ سوشل میڈیا ایپ ’سنیپ چیٹ‘ اُتے اپنے اختلافات دا وکھالا کردے ہوئے فریال دا کہنا سی کہ اوہناں نوں جھوٹھ توں نفرت اے ایس لئی اوہ کدی چُپ نہیں رہن گیاں، بھاویں چور ہووے، لٹیرا ہووے یاں قاتل، تُسیں ماں او تے اتھر و کڈھو گے تے لوک تے ہمدردی کرن گے ای۔
فریال مخدوم نے اپنے دیور تے عامر خان دے نکے بھرا ہارون دی اعتراض جوگ تصویر لا کے آکھیا کہ میرے کپڑے اوہناں نوں ایشو لگدے نیں تے اوہناں دیاں دھیاں لیڑا نہیں لیندیاں، کیہ اوہ ایس لئی ٹھیک اے کہ اوہ خونی رشتے نیں تے میں نوہ آں؟ ایہ کس طرحاں دی دوغلی پالیسی اے؟ اوہناں دا کہنا سی کہ مینوں3سال توں نوہ منیا ای نہیں گیا، ایہ کوئی ایشو نہیں؟ میں تن سال جہنم وچ لنگھائے، کیہ اوہ ٹھیک سی؟ ایہ کِنی نیچ ذہنیت اے، مضحکہ خیز امیداں نیں کہ نوہ نوں تُسیں باندریاں وانگ رکھو، اپنیاں دھیاں سوہریاں وچ اک دن نہ ٹکن تے تُسیں میرے سِر اُتے چڑھ جاﺅ۔
