ریاض(پاکستان پوائنٹ نیوز13۔دسمبر2016ء) برقعے تے حجاب توں بغیر سوشل میڈیا اُتے تصویر اپ لوڈ کرن والی سوانی نے پچھلے دِنا ای سوشل میڈیا اُتے اک فساد کھڑا کر دِا سی جہدے بعد کئی وار سوشل میڈیا ورتیندڑاں نے سوانی دی گرفتاری دا مطالبا کیتا تے کسے نے سوانی دے ایس کم نوں سلاہیا ،پر ہن سعودی پولیس نے ذکر کیتی گئی سوانی نوں گرفتار کر لیا اے۔ عربی اخبار دی رپورٹ دے مطابق ریاض پولیس دے ترجمان کرنل فواض الیمین نے دسیا کہ سعودی پولیس نے کُجھ دن پہلے برقعے تے حجاب توں بغیر سوشل میڈیا اُتے تصویر اپ لوڈ کرن والی سعودی سوانی نوں گرفتار کر لیا اے جدکہ سوشل میڈیا اُتے وی اک ٹویٹر ورتیندڑ نے آکھیا کہ سوانی نوں گرفتار کر لیا گیا اے تے ساڈا مطالبا اے کہ اوس سوانی نوں سخت سزا دِتی جائے کیوں جے ریاست دا اک قانون اے تے ذکر کیتی گئی سوانی نے اوس قانون دی خلاف ورزی کیتی اے۔
یاد رہوے کہ ذکر کیتی گئی سوانی نے اپنی تصویر اپ لوڈ کردے ای ڈیلیٹ کر دِتی سی جہدے بعد اک ہور ٹویٹر اکاﺅنٹ نے ایہ تصویر پوسٹ کیتی تے دسیا کہ مس الشیری نے اپنی تصویر دے نال ای لکھیا سی کہ اوہ حجاب تے برقعے دے بغیر ناشتے لئی جا رہی اے جدکہ اوس تصویر نوں اپ لوڈ کرن تے سوشل میڈیا اُتے وائرل ہون دے بعد ذکر کیتی گئی سوانی نوں دھمکیاں وی ملیاں سن۔
