نویں دِلی(پاکستان پوائنٹ نیوز29۔اکتوبر۔2018ء) بابر ی مسجد شہید کرن و الے 28بندیاں نے اسلام قبول کر لیا۔ قومی اخبا ر دی اک رپورٹ وچ دسیا گیا اے کہ بابری مسجد نوں شہید کرن وچ ملوث اوس ویلے دے ہندو انتہا پسند بلیر سنگھ تے اج دے مسلمان محمد عامر نے آکھیا اے کہ بابری مسجد شہید کرن لئی کوٹھے اُتے چڑھیا تے بے چینی تے کپکپاہٹ شروع ہو گئی سی۔ انڈیا وچ 91مسجداں بنا چُکیا واں۔
اسلام قبول کرن وچ مینوں کوئی چھ مہینے لگ گئے سن۔ میرے ماں پیو تے دوویں بھرا وی مسلمان ہو گئے نیں۔ محمد عامر نے آکھیا کہ اسلام قبول کرن لئی چار مہینے مگروں میری گھر والی نے وی اسلام قبول کر لیا۔ جدکہ بابری مسجد شہید کرن والے 28لوکاں نے وی اسلام قبول کر لیا اے۔ ایہناں 28بندیاں نے مولانا کلیم صدیقی دے ہتھ اُتے اسلام قبول کیتا۔ باقی بزرگان دین راہیں وی بہت سارے لوکاں نے اسلام قبول کیتا۔
بابری مسجد شہید کرن والیاں تنظیماں دے سرداراں دیاں دھیاں تے گھر والے، سارے اسلام قبول کر رہے نیں۔ اوہناں نے ہور آکھیا کہ میری پاکستان جان دی خاہش اے اوتھوں جدوں لوک آؤندے تے مینوں خشی ہوندی اے۔ محمد عامر دا آکھنا سی کہ بنگلا دیش وچ 2014و چ میرے کولوں اک مسجد دی نینہہ رکھوائی گئی جیہدا ناں بابری رکھیا گیا۔ اوہدا آکھنا سی کہ پاکستان وی بابری مسجد دی بنیاد رکھن لئی بلوائے تے اوہدا ناں وی بابری رکھے یاں فیر جو وی ناں رکھنا چاہے۔یاد رہوے کہ بابری مسجد دی شہادت دے مرکزی کرداراں وچ شیو سینا دے سابق رہنما بلیر سنگھ شامل سن۔ جیہناں نے بابری مسجد نوں شہید کرن وچ ودھ چڑھ کے حصہ لیا پر چالو ورھے اوہناں نے اسلام قبول کر کے اپنے ناں محمد عامر رکھ لیا۔
