اسرائیل دی وزیر دا جامعہ مسجد ابوظہبی دا دورہ، سوشل میڈیا اُتے نویں بحث چھڑ گئی

اسرائیل دی وزیر دا جامعہ مسجد ابوظہبی دا دورہ، سوشل میڈیا اُتے نویں بحث چھڑ گئی

ابوظہبی(پاکستان پوائنٹ نیوز29۔اکتوبر۔2018ء) اسرائیلی وزیر ثقافت و کھیڈ نے جامعہ مسجد ابوظہبی دا دورہ کیتا۔ اسرائیلی وزیر نے مسجددا دورہ کرن اُتے خشی دا اظہار کیتا۔ تفصیل مطابق اسرائیل دی جوڈو ٹیم متحدہ عرب امارات وچ موجود اے، جتھے اوہناں نے جوڈو دے مقابلیاں وچ رلت کیتی تے ایس مقابلے وچ بہترین کارکردگی دا وکھالا کیتا۔ اسرائیلی ٹیم نے ایس مقابلے وچ ساریاں ٹیماں نوں ہراندے ہوئے پہلی پوزیشن حاصل کیتی۔

ایس موقعے تے اسرائیلی وزیر کھیڈ میری ریغیف وی اوتھے سن۔ اوہناں نے ایس دورے دوران جامعہ مسجد ابوظہبی دا دورہ وی کیتا۔اوہناں نے اپنے دورے دوران اسلامی ریتاں نوں مُکھ رکھدے ہوئے مناسب کپڑے پائے ہوئے سن تے سِر نوں وی ڈھکیا ہویا سی۔ مسجد دے دورے ویلا اماراتی حکام وی اوہناں نال سن۔ اسرائیلی وزیر دا سوشل میڈیا پوسٹ وچ آکھنا سی کہ اوہناں نوں خشی اے کہ اوہ پہلی سینئر اسرائیلی شخصیت نیں ،جیہناں نے مسجد وچ پروہنیاں دی کتاب اندر اپنے تاثرات دا اظہار کیتا۔ پر مسجد والی اوہناں دی تصویر سوشل میڈیا اُتے وائرل ہو گئی اے ،جیہدے اُتے سوشل میڈیا ورتیندڑاں ولوں کئی قسم دے تبصرے کیتے جا رہے نیں۔