نویں دِلی(پاکستان پوائنٹ نیوز11۔اکتوبر2017ء) بھارتی تعلیمی بورڈ نے کشمیر نوں وکھ ریاست من لیا اے۔ تفصیل مطابق بھارتی ریاست بہار دے تعلیمی بورڈ نے آخیر من لیا اے کہ کشمیر بھارت دا حصہ نہیں اے بلکہ وکھ ریاست اے۔ تعلیمی بورڈ نے پوری ریاست وچ 8ویں کلاس دے امتحان لین لئی اک سوالنامہ تیار کیتا۔ سوالنامے وچ پُچھیا گیا سی کہ ایہناں 5ملکاں دے باشندیاں نوں کیہ آکھدے نیں۔
ایہناں 5ملکاں وچ چین‘ نیپال‘ برطانیہ‘ بھارت تے کشمیر شامل سن۔ ایہ امتحان 5اکتوبر نوں ہویا سی۔ ایس گل نوں اک پڑھیار نے اجاگر کیتا۔ ایس حوالے نال ہن جدوں اک تعلیمی افسر کولوں پُچھیا گیا تے اوہدا کہنا سی کہ اوہ چھٹی اُتے سی تے کُجھ دن پہلے ای واپس آیا اے۔ افسر دا ہور کہنا سی کہ ایس معاملے اُتے پن چھان دی ضرورت اے۔ محکمہ تعلیم دے وسیلیاں دا کہنا سی کہ پیپر بنایا تے اک ای تھاں جاندا اے پر اوہدی چھپائی وکھو وکھ تھاواں اُتے ہوندی اے ایس لئی ایس معاملے دیاں تحقیقات کیتیاں جان گیاں۔
