نویں دِلی(پاکستان پوائنٹ نیوز22۔مارچ2017ء) بھارت نے جامع مذاکرات دی بحالی دی ذمے واری پاکستان اُتے پا دِتی۔ بھارتی میڈیا دے مطابق وزیر داخلا راجناتھ سنگھ نے راجیہ سبھا وچ خطاب کردے ہوئے آکھیا کہ بھارتی حکومت جمعوں و کشمیر اندر صورتحال نوں معمول اُتے لیان لئی سارے سٹیک ہولڈرز نال گل بات لئی تیار اے پر گھٹو گھٹ پاکستان نوں ایس معاملے وچ شروعات کرنی چاہیدی ۔
پاکستان نال مذاکرات شروع نہ ہون دے حوالے نال ارکان ولوں پُچھے گئے سوالاں دے جواب وچ راجناتھ سنگھ نے آکھیا کہ سابق حکومت نے وی پاکستان نال ریاسی دہشت گردی دے خاتمے دی شرط رکھی سی تے اسیں وی اوہدے اُتے قائم آں۔ مقبوضہ کشمیر دی صورتحال دے حوالے نال بھارتی وزیر داخلا نے آکھیا کہ اسیں ہر کسے نال گل کرن نوں تیار آں۔ پوری قوم کشمیر دی صورتحال نوں معمول اُتے ویکھنا چاہندی اے۔ اوہناں دا کہنا سی کہ اسیں ایس سلسلے وچ سبھ نال تعاون کرن تے سارے اقدامات کرن نوں تیار آں۔
