چین(پاکستان پوائنٹ نیوز09۔جنوری2018ء) اجکل دے دور وچ گرل فرینڈ تے بوائے فرینڈ رکھنا کوئی وڈی گل نہیں اے پر چین وچ اک سوانی نوں اپنے بوائے فرینڈ توں اجیہا دھوکھا ملیا کہ ہن اوہ ساری زندگی کسے نوں وی اپنا بوائے فرینڈ بنان توں پہلاں ہزار وار سوچے گی۔چینی سوانی نوں چھ مہینے اپنے بوائے فرینڈ نال رہن مگروں پتا لگا کہ اوہدا بوائے فرینڈ اصل وچ کُڑی اے۔
چینی سوانی نوں کُجھ دن پہلے ای ایس گل دا پتا لگا کہ جس بوائے فرینڈ نال اوہ گل کر رہی اے اصل وچ اوہ اک کُڑی اے۔ وانگ قی نامی 40ورھیاں دی سوانی 2016وچ اپنے بوائے فرینڈ نال آن لائن ملی۔ پہلاں اوہنوں لگا کہ عمراں دے واضح فرق دی وجہ توں دوواں دا رشتہ نہیں ہو سکے گا پر قیان نے اوہدی اک نہ سنی تے 2016وچ دوواں نے ملاقاتاں دا سلسلا شروع کیتا تے کُجھ چِر مگروں ای دوویں اک دوجے نال رہن لگ پئے۔
اک سال مگروں قیان اچانچک غائب ہو گیا۔ وانگ نے قیان اُتے 3لکھ یوان خرچ کیتے سن۔ لما چِر بھالن مگروں وانگ قی نوں پتا لگا کہ اوہ جہنوں بوائے فرینڈ من کے اوہدے نال رہ رہی سی اوہ اصل وچ اک کُڑی ای اے۔ ایس گل دا انکشاف قیان دے شناختی کارڈ توں ہویا۔ وانگ دا کہنا سی کہ مینوں کدی وی اوہدے مُنڈے ہون دا شک نہیں ہویا۔
