بھارت(پاکستان پوائنٹ نیوز06۔نومبر2017ء) اُنج تے بھین بھرا دا رشتہ بہت ای انمول ہوندا اے، ایس رشتے دی خاص گل ایہ ہوندی اے کہ بھین بھرا جِناوی آپسی وچ لڑنیں پر اونا ای اوہناں وچ پیار وی ڈونگھا ہوندا اے۔ اجیہی ای اک مثال بھارت اندر وی ویکھن وچ آئی اے جتھے اک سکول جان والے 13ورھیاں دے بال نے اپنی بھی نوں سکوٹر لے کے دین لئی 62ہزار رُپئے جوڑے۔ تفصیل مطابق جے پور دے رہائشی 13ورھیاں دے یش نے دوالی دے موقعے تے اپنی بھین نوں سکوٹر تحفے وچ دین دا فیصلا کیتا، جہدے لئی یش ہونڈا دے اک شو روم وچ گیا تے اوتھوں سکوٹر دی قیمت سکیاں وچ دتی۔
بھارتی میڈیا دی رپورٹ مطابق شو روم بند ہون توں کُجھ چِر پہلاں ای یش اپنی بھین تے سکیاں نال بھرے ہوئے دو تھیلیاں نال شو روم آیا۔ شوروم دے سٹاف نے پہلاں تے سکیاں دی مد وچ اینی وڈی رقم لین توں انکار کیتا پر یش نے اوہناں نوں دسیا کہ اوہنے اپنے بھین لئی سکوٹر خریدن کارن کئی ورھیاں وچ ایہنے پیسے اکٹھے کیتے نیں، جہدے اُتے شو روم دا سٹاف وی راضی ہو گیا۔
یش نے دسیا کہ سانوں سکیاں وچ جیب خرچ ملدا سی تے جدوں کدی سانوں جیب خرچ وچ نوٹ دتا جاندا تے اسیں اوہدے سکے کر لیندے۔ ڈیلر سنتوش کمار نے دسیا کہ ساڈے کول کئی اجیہے گاہک آؤندے نیں جو گڈیاں دی رقم ادا کرن لئی سکیاں دی صورت وچ وی پیسے دیندے نیں، پر ایہ اک سپیشل کیس دی جہدے چچ کسٹمر نے پوری دی پوری رقم ای سکیاں وچ دتی۔ بھارتی میڈیا دی رپورٹ مطابق یش تے اوہدی بھین دے پیسے گنن لئی شوروم سٹاف نوں پورے ڈھائی گھنٹے لگے، جہدے کارن شوروم وی دیر نال بند ہویا۔
