لاہور(پاکستان پوائنٹ نیوز26۔ستمبر2017ء) کہندے نیں کہ علم حاصل کرن لئی عمر دی کوئی حد نہیں ہوندی ایس گل دا عملی ثبوت 98ورھیاں دے بھارتی شہری کمار ویشیا نے نالاندا اوپن یونیورسٹی توں سکینڈ ڈویژن نال ماسٹر اکنامکس دی ڈگری لے کے دتا اے۔ میڈیا رپورٹس مطابق کمار ویشیا نے آکھیا کہ 1938وچ میں اپنی گریجویشن دی ڈگری حاصل کیتی سی پر ہمیشہ ای میری کوشش رہی کہ میں ماسٹر دی ڈگری حاصل کراں‘ آخیر میں جس شے دا شوق رکھیا اوہنوں پورا کر لیا۔
کمار ویشیا نے 98ورھیاں دی عمر وچ ماسٹر کردے ہوئے نوجوان نسل نوں پیغام دتا اے کہ اوکڑاں سبھ نوں ہوندیاں نیں پرانسان نوں اپنے اُتے یقین ہونا چاہیدا۔ یقین ہوئے گا تے فیر ای بندہ منزل حاصل کر سکدا اے۔ کمار نے آکھیا کہ میں 1980وچ اک پرائیویٹ ادارے توں ریٹائرڈ ہویا واں تے 2015وچ میں ماسٹر دی ڈگری حاصل کرن یونیورٹی داخلا لیا۔
