سرگودھا(پاکستان پوائنٹ نیوز01۔مئی2017ء) اُنج تے ہر انسان دا کوئی نہ کوئی شوق ضرور ہوندا اے پر سرگودھا دے دوالی پنڈ 30جنوبی دے رہائشی 50ورھیاںد ے محمد ناصر دا شوق اجیہا دلچسپ اے جہدے توں اوہدے نیڑے تیڑے وسدے لوک وی فائدا چُکدے نیں۔تفصیل دے مطابق ناصر نوں دیس پردیس دیاں خبراں تے معلومات اکٹھیاں کرن دا جنون اے۔ محمد ناصر دا کہنا اے کہ اوہ پچھلے 24ورھیاں توں کئی اخباراں وچ چھپن والیاں اہم معلومات اکٹھیاں کر رہیا اے۔
محمد ناصر ہن تک 26لکھ توں ودھ معلومات جمع کر چکیا اے۔ ایہناں معلومات نوں کٹ کے محمد ناصر نے کئی کتاباں وچ لایا اے جہناں دا بھار 85کلو اے۔ ایہو نہیں 50توں ودھ ملکاں دی کرنسی دے سکے وی محمد ناصر دے ایس ذخیرے دا حصہ نیں۔ محمد ناصر دا کہنا اے کہ میرے کول ہر قسم دیاں معلومات نیں۔ محمد ناصر دا دعوا اے کہ پنڈ وچ پچھلے 35ورھیاں دے دوران ہون والے ہر ویاہ دا کارڈ وی اوہنے اپنے کول محفوظ کیتاہویا اے۔ محمد ناصر دے ایس انوکھے شوق اُتے اوہدے پنڈ والے حیران نیں۔ اوہناں دا کہنا اے کہ اسیں کوئی وی معلومات لینیاں ہون تے اوہ محمد ناصر کولوں لیندے آں۔ ایس توں وکھ محمد ناصر کبڈی دا وی شوقین اے، اوہنے کبڈی وچ کئی انعام وی جِتے نیں۔
