اسلام آباد(پاکستان پوائنٹ نیوز29۔مارچ2017ء) چنگی تعلیم حاصل کرن مگروں چنگی نوکری تے سکون ہر پڑھیار دا خاب ہوندا اے پر کُجھ پڑھیار اجیہے وی ہوندے نیں جہناں دا خاب اجیہے کئی خاباں توں وڈا ہوندا اے جہناں دا اثر اوہناں دی اپنی ذات تک ای نہیں بلکہ دوجیاں دیاں زندگیاں اُتے وی ہوندا اے۔ اجیہی ای اک پاکستانی کُڑی دی کہانی سوشل میڈیا اُتے مقبول ہو گئی اے جہنے وفاقی راجدھانی اسلام آباد وچ اپنی چنگی نوکری تے تنخاہ نوں چھڈ دتا تے بالاں نوں تعلیم دین ہنزہ پہنچ گئی۔
26ورھیاں دی ماروی سومرو نے اپنے خیالاں تے سوچ نال نہ صرف ہنزہ دے پنڈ نوں بدلن دا ارادا کیتا بلکہ ماروی دی ایہ سوچ سوشل میڈیا اُتے وی مقبول ہو گئی اے۔ جہنوں ورتیندڑاں ولوں ڈاڈھا سلاہیا جا رہیا اے۔ ماروی نے ہنزہ وچ پہلے توں موجود سکول نوں جوائن کردے ہوئے تعلیمی نظام وچ بہتری لئی کم شروع کر دتا اے۔ پیشے دے اعتباد نال ماروی کوئی اُستانی نہیں بلکہ اک سافٹ ویئر انجینئر اے پر ماروی نے اپنی سوچ تے ہمت نال ملک وچ تعلیم نوں عام کرن لئی کم شروع کر دتا اے۔
ماروی دا کہنا اے کہ مینوں کدی ایتھے آ کے محسوس نہیں ہویاکہ میں دوجی تھاں آ گئی آں۔ ماروی نے دسیا کہ میں ایتھے 2500رُپئے مہینہ وار کرائے دے مکان وچ رہ رہی آں۔ اینے پیسیاں نال اسلام آباد وچ رہائش نہیں لتی جا سکدی۔ میں ایتھے بڑی خش آں۔ ماروی دا کہنا سی کہ میں کارپوریٹ سیکٹر وچ چنگی نوکری کر رہی ساں تے چار ورھیاں تک نوکری کرن مگروں مینوں احساس ہویا کہ میں صرف امیر لوکاں دی مدد کر رہی آں۔ دوجے پاسے سوشل میڈیا ورتیندڑاں نے ماروی دی ایس کوشش تے سوچ نوں سلاہن دے نال نال ماروی لئی نیک خاہشاں دا وکھالا وی کیتا۔
