فڪر اقبال جي روشني ۾ مسئلن جو حل ڳوليو وڃي: مريم اورنگزيب

اسلام آباد (پاکستان نیوز پوائنٹ 9نومبر2016ء) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته فڪر اقبال جي روشني ۾ مسئلن جو حل ڳوليو وڃي، اسلام جي حقيقي روح کي ڄاڻڻ لاءِ نوجوان علامه اقبال جو مطالعو ڪن. اربع ڏينهن اقبال جي جنم ڏينهن تي پنهنجي پيغام ۾ هن مفڪر پاڪستان کي خراج عقيدت پيش ڪندي چيو ته علامه اقبال مسلمان امت جي اتحاد ۽ وقار جي علامت بڻجي چڪو آهي، اقبال جي تعليم جي ذريعي انتهاپسندي ۽ شدت پسندي جو خاتمو ڪري سگهجي ٿو. هن چيو ته علامه اقبال جي پيغام جي سچائي تي ٻڌل آهي ۽ اهو وقت ۽ زبان جي قيد کان آزاد آهي، اقبال دعوائن بدران عملي نمونو پيش ڪيو. مملڪتي وزير چيو ته وزيراعظم محمد نواز شريف ملڪ کي قائداعظم محمد علي جناح ۽ علامه اقبال جي منزل طرف وٺي وڃي رهيو آهي.