اسلام آباد (پاکستان نیوزپوائنٹ 13 فروری2018ء) قومي اسيمبلي ملڪ ۾ انتهاپسندي ۽ عدم برداشت جي خاتمي جي لاءِ وڌ کان وڌ قومي هم آهنگي جي ضرورت تي زور ڏيندي قرارداد جي منظوري ڏئي ڇڏي آهي. ڪالهه اڱاري ڏينهن بيلم حسنين قرارداد ايوان ۾ پيش ڪئي. مذهبي معاملن واري وفاقي وزير سردار محمد يوسف چيو ته حڪومت اڳ ۾ ئي مذهبي هم آهنگي جي لاءِ ڪم ڪري رهي آهي، اقليتي ڪميشن ٺاهي ڇڏي آهي، ان ۾ مسلمان ۽ غيرمسلمان هر هڪ جي نمائندگي آهي. اهو مذهبي ڏڻ مذهبي عقيدت سان سرڪاري طور تي ملهايو وڃي ٿو. هن چيو ته اسان عالمي ڪانفرنس منعقد ڪرڻ جو فيصلو ڪيو آهي، سمورن فرقن ۽ مذهبن سان تعلق رکندڙ عالم ۽ دانشور شرڪت ڪندا. حڪومت ان حوالي سان تجويزن جي آجيان ڪندي. بيلم حسنين چيو ته ماڻهن جي دلين ۾ سگهه پيدا ٿيڻ گهرجي. انسان کي انسانيت جي طور تي ڏسڻ گهرجي. مذهب جي نالي تي تشدد کان پاسو ڪرڻ گهرجي. شير اڪبر خان چيو ته ملڪ ۾ هڪ ڏينهن روزو ۽ عيد نٿي ٿئي، جيڪڏهن سعودي عرب سان گڏ روزو ۽ عيد ٿئي ته اهو ملڪ ۽ قوم جي لاءِ سٺو آهي. حاجي غلام احمد بلور چيو ته هڪ ٻئي کي ڪافر قرار ڏئي قتل ڪرڻ کان پاسو ڪرڻ گهرجي، دنيا جي سمورن مسلمان ملڪن ۾ سواءِ ايران پاڪستان جي هڪ ئي ڏينهن روزو ۽ عيد ٿئي ٿي. جيڪڏهن سعودي عرب سان گڏ به اسان عيد روزو ڪري وٺون ته اهو مسئلو حل ٿي ويندو. شازيه مري چيو ته رڳو تقريبون ڪرڻ ڪافي نه آهي، مذهبي عدم برداشت اڄ تمام وڌيڪ آهي، اسان پاڪستان مان دهشتگردي، عسڪريت پسندي، نفرت پکيڙيندڙ تقريرون ختم نه ڪري سگهيا آهيون، حڪومت مخالف ڌر سان گڏجي هڪ حڪمت عملي ٺاهي ته جيئن انهن بيمارين جو خاتمو ٿئي. عائشه گلالئي چيو ته مسيحي برادري جو مطالبو آهي ته اهي اقليتن جي لاءِ مخصوص سيٽون سڌوسنئون چونڊن سان ڀريون وڃن، گوجره جهڙا واقعا ٿيڻ جي سببن تي غور ڪيو وڃي. اسلامي نظرياتي ڪائونسل جو ان حوالي سان ڪردار اهم هجڻ گهرجي. هي قرارداد منظور ٿيڻ گهرجي. ثريا اصغر چيو ته اسلام حسن اخلاق جو درس ڏي ٿو، اسان جي معاشري ۾ عدم برداشت آهي، قرارداد جي حق ۾ سيد عيسيٰ نوري پڻ ڳالهايو. مولانا محمد خان شيراني چيو ته اهو ٻڌي افسوس ٿئي ٿو ته جڏهن اها ڳالهه ڪئي وڃي ٿي ته مذهب انسان کي پاڻ ۾ ويڙهائي ٿو.
قومي اسيمبلي پاران ملڪ ۾ انتهاپسندي ۽ عدم برداشت جي خاتمي جي لاءِ وڌ کان وڌ قومي هم آهنگي جي ضرورت تي زور ڏيندي قرارداد منظور
6 سال پھريان
