قومي اسيمبلي پاران قومي اسيمبلي سيڪريٽريٽ ملازم بل 2018ع منظور

اسلام آباد (پاکستان نیوزپوائنٹ 13 فروری2018ء) قومي اسيمبلي قومي اسيمبلي سيڪريٽريٽ ملازم بل 2018ع جي منظوري ڏئي ڇڏي آهي. ڪالهه اڱاري ڏينهن نگهت پروين مير قومي اسيمبلي ۾ رٿ پيش ڪئي ته هن بل کي غور هيٺ آندو وڃي، ان جي منظوري کانپوءِ هن بل ايوان ۾ پيش ڪيو. ڊپٽي اسپيڪر ان جي مرحليوار منظوري ورتي. ڊاڪٽر عارف علوي پاران پيش ڪيل ترميم ايوان اڪثريت راءِ سان رد ڪري ڇڏي. گريڊ هڪ کان 15 تائين قومي اسيمبلي سيڪريٽريٽ جي سليڪشن ڪميٽي کاتو ڪندي، 16 ۽ 19 تائين جي ملازمن جي ڀرتي پبلڪ سروس ڪميشن ذريعي ٿيندي. ڊاڪٽر عذرا فضل، شفقت محمود ۽ خورشيد شاهه جو موقف هو ته گريڊ هڪ کان 15 تائين جي ملازمن جون ڀرتيون به باقاعده اشتهار ڏئي طريقيڪار تحت ڪيون وڃن. سيد نويد قمر چيو ته قومي اسيمبلي سيڪريٽريٽ جي ملازمن کي سول سروس جو درجو حاصل نه آهي، اسان اختيار فرد واحد کي ڏيڻ جي حمايت نه ٿا ڪري سگهون، بل اتفاق راءِ سان منظور ٿيڻ گهرجي، ان کي بلڊوز نه ڪيو وڃي. پارلياماني معاملن واري وفاقي وزير شيخ آفتاب احمد سندس موقف سان اتفاق ڪيو ۽ مخالف ڌر جي ترميم جي حمايت ڪئي. ڊاڪٽر عارف علوي ترميم پيش ڪئي ته گريڊ هڪ کان 15 تائين جي ملازمن جون ڀرتيون به اشتهار ڏئي ڪيون وڃن، ان جو اختيار سليڪشن ڪميٽي کاتي وٽ نه هجڻ گهرجي. قومي اسيمبلي ان ترميم جي منظوري ڏئي ڇڏي. ڊاڪٽر عارف علوي جي درخواستگذار جي ڪردار ۽ قابليت رکندڙ هجڻ جي حوالي سان پڻ ترميم منظور ڪئي وئي. ڊپٽي اسپيڪر هڪٻئي کانپوءِ سمورين شقن جي ايوان مان منظوري ورتي، نگهت پروين مير رٿ پيش ڪئي ته قومي اسيمبلي سيڪريٽريٽ ملازم بل 2018ع کي منظور ڪيو وڃي، قومي اسيمبلي بل جي منظوري ڏئي ڇڏي.