نویں دِلی(پاکستان پوائنٹ نیوز09۔فروری2017ء) بھارتی میڈیا نے دعوا کیتا اے کہ مبینہ طور اُتے پاکستان دا جاسوس کبوتر پولیس دی قید توں فرار ہون وچ کامیاب ہو گیا اے، کبوتر فرار ہون دی اطلاع انٹیلی جنس ایجنسیاں نوں دے دِتی گئی اے۔ تفصیل دے مطابق جمعرات نوں بھارتی میڈیا دے مطابق پاکستانی جاسوس کبوتر راجستھان پولیس دی نااہلی پاروں اوس ویلے قید توں فرار ہون وچ کامیاب ہو گیا جدوں اک کانسٹیبل نے پُن چھان لئی اوہدا پنجرا چُکن دی کوشش کیتی۔
مبینہ طور اُتے پاکستانی جاسوس کبوتر نوں سری گانگا نگر ضلع توں 2گھنٹیاں دی کوشش مگروں پھڑیا گیا سی۔ پولیس نے انٹیلی جنس ایجنسیاں نوں کبوتر دے فرار ہون بارے دس دِتا اے جہدے مگروں پولیس افسراں نے الرٹ جاری کر دِتا اے۔ بھارتی حکام دا دعوا اے کہ کبوتر واپس پاکستان ول اُڈ گیا اے۔ بھارتی حکام نے کبوتر نوں پھڑن مگروں اوہنوں جاسوس قرار دِتا سی جہدے اُتے بھارتی حکام مطابق’ 5547جانباز خان‘دا ٹیگ لگیا ہویا سی تے اوہدے اُتے اک فون نمبر وی لکھیا ہویا سی۔
یاد رہوے کہ اکتوبر 2016وچ بھارتی سکیورٹی فورسز نے لائن آف کنٹرول نیڑے اک ہور پاکستانی کبوتر نوں گرفتار کرن دا ڈراما کیتا سی جہدے اُتے بھارتی وزیر اعظم نریندر مودی لئی اک انتباعی نوٹ لکھے جان دا دعوا کیتا گیا سی جدکہ ایس توں پہلے وی بھارت کبوتر، توتے تے پکانے پاکستانی جاسوس ہون دا دعوا کردا رہیا اے۔
