ریاض(پاکستان پوائنٹ نیوز01۔فروری2017ء) سعودی وزیر دفاع دے مشیر تے یمن وچ آئینی حکومت دی سپورٹ کرن والے عرب عسکری اتحاد دے ترجمان بریگیڈیئر جنرل احمد عسیری نے آکھیا اے کہ الحدیدہ دی بندرگاہ توں حملیاں دا شروع ہونا تے سعودی بحری جنگی جہاز نوں نشانا بنایا جانا اک تخریبی کارروائی تے خطرناک اشارا اے۔ اک عرب ٹی وی نال گل بات کردے ہوئے عسیری دا کہنا سی کہ سعودی جنگی جہاز الحدیدہ دی بندرگاہ لئی آن والے بحری جہازاں دی نگرانی کر رہیا سی۔
اوہناں نے واضح کیتا کہ باغی ملیشیاں کارروائیاں کر کے بحرا حمر وچ جہاز رانی دی سکیورٹی نوں نشانا بنا رہی اے۔ عسیری دے مطابق الحدیدہ دی بندرگا،ایہناں اہم بندرگاہ وچوں اے جو یمن آن والی انسانی امداد تے تجارتی مواد دی وصولی لئی ورتی جاندی اے۔ ایس لئی الحدیدہ دی بندرگاہ توں دہشت گرد حملیاں دی شروعات پاروں ایس بندرگاہ اُتے آوا جاوی متاثر ہووے گی تے ایہ باغی ملیشیاں دی تخریبی کارروائیاں دا اک حصہ اے۔
سعودی مشیر دفاع نے ہور آکھیا کہ یمن وچ حوثی باغیاں تے القاعدہ تنظیم اک اِکو ویلے وچ دہشت گردی دا وڈا خطرا نیں۔ ایہ اک ای سکے دے دو پاسے نیں جو رلکے کم کر رہے نیں۔ باغی ملیشیاں ہتھوں بحرا حمر وچ بین الاقوامی جہاز نوں نشانا بنائے جان دا ایہ چوتھا واقعہ اے۔ پہلا واقعہ اک اماراتی امدادی جہاز خلاف سی جدکہ دوجے تے تیجے واقعے وچ امریکی جنگی جہاز نوں نشانا بنایا گیا۔
ایس توں پہلے یمن وچ آئین دی بحالی لئی سرگرم عرب اتحاد ولوں جاری اک بیان وچ دسیا گیا کہ پیر دی شام سعودی جنگی جہاز ول آن والےاں تن وچوں دو کشتیاں نوں روک دِتا گیا جدکہ بارود نال بھری اک کشتی جہاز نال ٹکرا گئی۔ آپ مارو کشتی ٹکران دے نتیجے وچ اک زور دار دھماکا ہویا تے جہاز وچ اگ لگ گئی۔ عملے نے فوری کارروائی کر کے جہاز وچ لگی اگ اُتے قابو پالیا پر دھماکے دے نتیجے وچ دو اہلکار شہید تے تن زخمی ہو گئے۔ زخمیاں نوں علاج لئی ہسپتال منتقل کیتا گیا جتھے اوہناں دی حالت ہن خطرے توں باہر دَسی گئی اے۔
