نویں دِلی(پاکستان پوائنٹ نیوز28۔جنوری2017ء) بھارتی آرمی چیف بپن راوت نے بھارتی فوجی جواناں دیاں ودھدیاں ہوئیاں شکایتاں تے مَندے سلوک مگروں اپنا وٹس ایپ نمبر جاری کر دِتا، دوجے پاسے انڈین انٹیلی جنس ایجنسیاں نے تحفظات دا وکھالا کر دِتا۔ بھارتی ٹی وی دے مطابق بھارتی فوجی سربراہ نے اپنے جواناں نوں پیش اوکڑاں، اعلا افسراں دے مَندے سلوک تے مسائل نوں براہ راست جانن تے اوہناں دے ازالے لئی اپنا وٹس ایپ نمبر جاری کردے ہوئے حکم جاری کیتا اے کہ انڈین فوج دے اہلکار اپنے مسائل نوںسوشل میڈیا تے ٹی وی چینلز نال شیئر کرن دی بجائے براہ راست اوہناں نوں وٹس ایپ راہیں گھلن، جنرل بپن راوت نے ایہ کم بھارتی فوجی اہلکاراں ولوں سوشل میڈیا اُتے شیئر کیتیاں گئیاں کئی ویڈیوز بعدوں کیتا اے۔
ایس توں پہلے جنرل بپن راوت نے فوجی کیمپاں وچ مَندے کھانے تے مَندے سلوک دیاں شکایتاں ساہمنے آن اُتے اپنے جواناں نوں دھمکی دیندے ہوئے آکھیا سی کہ سوشل میڈیا اُتے پانی وچ ہلدی رلاکے سالن دین تے سُکھی روٹی دی شکایت لان والے اہلکاراں خلاف کیتی جائے گی۔ تازا حکم وچ جنرل بپن راوت نے اپنے ’مظلوم فوجیاں‘ دی شکایت جانن لئی وٹس ایپ نمبر 09643300008جاری کردے ہوئے حکم دِتا اے کہ ہن اہلکار فیس بک تے ہور سوشل میڈیا اُتے اپنے مسئلے بیان کرن دی بجائے ایس نمبر اُتے شکایت پوسٹ کرن۔
بھارتی فوجی حکام دا کہنا سی کہ بھارتی فوج دا انٹرنل احتساب دا نظام تے شکایتاں جانن دا سسٹم بہت تیز اے پر جے کوئی اہلکار اپنے نال ہون والی زیادتی تے جائزا شکایتاں نوں فوجی سسٹم تے فورم اُتے ساہمنے لیان مگروں وی ہون والے ازالے توں ناخش اے تے اوہ بھارتی فوج دے سربراہ جنرل بپن راوت دے دفتر توں ایس وٹس ایپ نمبر اُتے ڈائریکٹ رابطا کر سکدا اے۔
دوجے پاسے انڈین فوج تے انٹیلی جنس اداریاں دے کئی افسراں نے جنرل بپن راوت دے ایس حکم اُتے اپنے تحفظات دا وکھالا کردے ہوئے آکھیا کہ وٹس ایپ اُتے آن والے کسے وی ناپسندیدا پیغام نوں روکنا ناممکن ہو جائے گا کیونکہ ایہ اک عام وٹس ایپ نمبر اے جہدے اُتے بھارتی اہلکار ای نہیں بلکہ دنیا بھر وچ مو جود کوئی وی بھارتی آرمی چیف دے ناں کوئی وی ویڈیو، آڈیو پیغام تے کسے وی طرحاں دا لنک سینڈ کر سکدا اے تے اسیں ایہدے اُتے کُجھ نہیں کر سکاں گے۔
