واشنگٹن(پاکستان پوائنٹ نیوز27۔جنوری2017ء) امریکا دی سینٹرل انٹیلی جنس ایجنسی (سی آئی اے) ولوں اپنی ویب سائٹ دے ڈیٹا بیس لئی جاری کیتیاں گئیاں دستاویزات وچ پاکستان، بھارت تے اسرائیل نوں حقیقی طور اُتے نادان قوماں آکھیا گیا اے، 17اپریل 2001نوں مشرقی وسطی دے ایریا سروے دے سرناویں ہیٹھ جاری کیتیاں گئیاں دستاویزات وچ سی آئی اے نے کئی ملکاں دی پُن چھان کیتی، جہدے وچ مشرقی وسطی دے ’عرفی‘ناں دے تحت سی آئی اے نے ہور ملکاں نوں اکٹھا کیتا، جہناں وچ پاکستان، بھارت، سیلون (سری لنکا)، ایران، ترکی، یونان، مصر، اسرائیل تے عرب ملک شامل نیں۔
سی آئی اے نے اپنیاں دستاویزات وچ سری لنکا لئی 60دے دہاکے وچ ورتے جان والے ناں ’سیلون‘ دا ذکر کیتا۔ ایہناں دستاویزات وچ خطے دی جغرافیائی تے سیاسی صورتحال، معیشت تے حالیا رجحاناں دے حوالے نال گل بات کیتی گئی۔ دستاویزات وچ پاکستان، بھارت تے اسرائیل نوں حقیقی طور اُتے نادان قوماں دے طوراُتے بیان کیتا گیا۔ دستاویزات اندر ایس گل اُتے وی چانن پایا گیا کہ کس طرحاں پاکستان، ترکی تے یونان جدید دنیا وچ شامل ہونا چاہندے نیں پر باہرلی حمایت دے بغیر اوہ کم نہیں کر سکدے۔
معیشت اُتے چانن پاندے ہوئے اک اقتباس وچ دسیا گیا کہ کس طرحاں کمزور ریاستاں غیر ملکی کرنسی اُتے انحصار کردیاں نیں تے کس طرحاں مارکیٹاں ایس منظر نامے لئی مثالی نہیں سن۔ سبھ توں دلچسپ گل ایہ کہ دستاویزات وچ اک تھاں پاکستان تے بھارت دی انٹیلی جنس تے معلومات جمع کرن نوںوی جانبداری دی بنیاد اُتے تنقید دا نشانا بنایا گیا۔ دوجے پاسے سی آئی اے نے پاکستان تے پاکستانیز دا حوالا دیندے ہوئے آکھیا کہ معلومات جمع کرن دے حوالے نال پاکستان تے بھارت کول وسائل دی کمی اے۔
یاد رہوے کہ انڈیا دے شہریاں لئی انڈینز دا لفظ ورتن دے نال نال سی آئی اے نے پاکستانیاں لئی پاکستانیز دا لفظ ورتیا سی جوکہ عام طور اُتے ورتیا نہیں جاندا۔ ذکر کیتیاں گئیاں دستاویزات اوہناں 930,000خفیہ فائلاں دا اک حصہ اے جہناں نوں سی آئی اے نے 17جنوری نوں جاری کیتا۔ یاد رہوے کہ 1999توں سی آئی اے تواریخی دستاویزات نوں سی آئی اے ریکارڈز سرچ ٹول (کریسٹ) دے تحت جاری کردی اے۔
