میرا سیاست وچ آن دا مقصد پیسے کمانا اے، بھارت وچ اک آزاد امیدوار دی ویڈیو سوشل میڈیا اُتے وائرل

آگرا(پاکستان پوائنٹ نیوز28۔جنوری2017ء) بھارتی ریاست آگرا پردیش دے شہر آگراوچ الیکشن وچ آزاد امیدوار دے طور اُتے حصہ لین والے اک سیاستدان دی ویڈیو سوشل میڈیا اُتے مشہور ہو گئی ۔ تفصیل دے مطابق سوشل میڈیا اُتے وائرل ہوئی ایس ویڈیو وچ چودھری ناں دے آزاد امیدوار توں جدوں اوہدے منصوبیاں تے آئندا دے لائحہ عمل بارے پُچھیا گیا تے اوہنے آکھیا کہ الیکشن جِتن مگروں میرا کوئی منصوبا نہیںاے میرا اک ای منصوبا اے تے اوہ ذاتی اے ، میں الیکشن جِت کے پیسے کمانے نیں تے سرمایا کاری کرنی اے۔ امیدوار نے آکھیا کہ جو وی آﺅندا اے اوہ انج ای کردا اے۔ سماجوا دی پارٹی وچ ای ایس طرحاں دے لوک ہے نیں جہناں نوں لوکائی نے چُنیا تے اوہ امیر ہو گئے۔ چودھری نے دسیا کہ ترقیاتی منصوبیاں لئی حکومت جو وی پیسے دیندی اے اوہدے وچوں 25فیصد تے سیاستدان دے حصے وچ ای آﺅندا اے، ایس طرحاں ہور وی کئی طریقے نیں پیسے کمان دے۔ امیدوار دا کہنا سی کہ ساڈے ملک وچ ہر سیاستدان ای لوکائی نوں بے وقوف بنا کے امیر ہو رہیا اے۔ بھارتی وزیر اعظم نریندر مودی نوں تنقید دا نشانا بناندے ہوئے اوہدا کہنا سی کہ کروڑاں دی گنتی وچ لوکائی نوں بے وقوف بنا کے اک بندا وزیر اعظم بن جائے تے اوہدے وچ لوکائی نوں بے وقوف بنان دی کوئی نہ کوئی قابلیت تے ہووے گی، میں وی ٹھیک ایسے طرحاں لوکائی نوں بے وقوف بناواں گا تے پیسے کماواں گا۔ بھارتی سیاستدان دی ایہ ویڈیو سوشل میڈیا اُتے وائرل ہو گئی اے جہنوں سوشل میڈیا ورتیندڑشیئر وی کر رہے نیں جدکہ ذکر کیتے گئے بندے نوں تنقید دا نشانا بنان دے نال نال ایہ سوال وی چُکیا جارہیا اے کہ کیہ سیاستدان اینے ایماندار وی ہو سکدے نیں؟؟؟