پیرس(پاکستان پوائنٹ نیوز25۔جنوری2017ء) یورپی ملک پاناما نے آف شور کمپنیاں دے حوالے نال لیک ہون والے خفیہ پاناما پیپرز دیاں تحقیقات معطل کر دِتیاں۔ فرانسیسی نشریاتی ادارے مطابق پاناما دے اٹارنی جنرل کینیا پورسل نے اک نیوز کانفرنس دے دوران دسیا کہ آئینی بنیاداں اُتے قانونی چینلج لئی تحقیقات روکنا ضروری اے، نال ای اوہناں نے آکھیا کہ ہن ایہ سپریم کورٹ اُتے اے کہ اوہ ایس معاملے اُتے فیصلا کرے کہ تحقیقات دوبارا ہونیاں چاہیدیاں یاں نہیں۔
یاد رہوے کہ پچھلے ورھے اپریل وچ پاناما پیپرز ولوں انٹرنیشنل کنسور شیم آف انویسٹی گیٹو جرنلسٹس دی ویب سائٹ اُتے آف شور کمپنیاں دے حوالے نال اک کروڑ 15لکھ دستاویزات اُتے مشتمل ڈیٹا جاری کیتا گیاسی، جہدے وچ درجناں سابق تے موجودا سربراہان مملکت، کاروباری شخصیتاں، مجرماں، مشہور شخصیتاں تے کھڈاریاں دیاں آف شور کمپنیاں دا ریکارڈ موجود سی۔
آف شور کمپنیاں دے حوالے نال موزیک فانسیکا دے نجی ڈیٹا بیس توں 2-6ٹیرا بائٹس اُتے مشتمل ، عام ہون والیاں ایہناں معلومات نوں امریکی سفارتی خطاں توں وی وڈا قرار دِتا گیا۔ دستاویزات وچ سیاسی و مشہور شخصیتاں بارے کئی انکشاف ساہمنے آئے، جہدے مگروں آئس لینڈ دے وزیر اعظم نوں عوامی احتجاج کارن مجبور ہو کے عہدے توں استعفی دینا پیا۔ برطانیا دے سابق وزیر عظم ڈیوڈ کیمرون نے اعتراف کیتا کہ اوہناں نے اپنے والد دی بنائی گئی آف شور کمپنی توں منافع کمایا۔
روسی صدر ولادی میر پیوٹن دے قریبی رشتے دار دا ناں ساہمنے آیا، جہدے بعد روسی صدر نے ایہ دعوا کیتا کہ پاناما پیپرز، اوہناں خلاف امریکا دی سازش اے۔ ارجنٹینا دے صدر ماریکیو مارکری دا وی آف شور کمپنی نال تعلق ساہمنے آیا۔ چین وچ سیاسی رہنماواں دے خاندان دیاں آف شور کمپنیاں نال تعلق دیاں خبراں میڈیا تے سوشل میڈیا نیٹ ورکس اُتے چلان اُتے پابندی لائی گئی۔ ایس توں وکھ پاکستانی وزیر اعظم نواز شریف داناں وی اوہناں دے بالاں دے حوالے نال پاناما لیکس وچ ساہمنے آیا تے ایس حوالے نال کیس سپریم کورٹ آف پاکستان وچ سنوائی ہیٹھ اے۔
